चंद्रपूर, (प्रतिनिधी) २७ जानेवारी - स्थानिक स्वराज्य संस्थांच्या निवडणुकीतही शिवसेना (उद्धव बाळासाहेब ठाकरे) पक्षाने आपला दरारा कायम राखला आहे. चंद्रपूर महानगरपालिकेत कोणत्याही एका पक्षाला स्पष्ट बहुमत न मिळाल्याने आता सत्तेची सर्व सूत्रे शिवसेना ठाकरे गटाच्या हाती आली आहेत. विशेष म्हणजे, ज्या भाजपने आजवर विरोधाची भूमिका घेतली, त्यांनीच आता सत्तेसाठी ठाकरे गटासमोर मैत्रीचा हात पुढे केल्याची चर्चा राजकीय वर्तुळात रंगली आहे.
काय आहे चंद्रपूरचा 'नंबर गेम'?
चंद्रपूरच्या ६६ जागांपैकी कोणत्याही पक्षाला ३४ हा बहुमताचा आकडा गाठता आलेला नाही.
* काँग्रेस: २७ जागा (सर्वात मोठा पक्ष)
* भाजप: २३ जागा
* शिवसेना (उबाठा): ६ जागा
* वंचित बहुजन आघाडी: २ जागा
* इतर: ८ जागा
भाजपची 'ती' ऑफर आणि अडीच वर्षांचा फॉर्म्युला!
सूत्रांनी दिलेल्या माहितीनुसार, काँग्रेसला सत्तेपासून दूर ठेवण्यासाठी भाजपने शिवसेना ठाकरे गटाला महापौरपदाची थेट ऑफर दिली असल्याचे समजते. यामध्ये 'अडीच-अडीच वर्षे महापौरपद' वाटून घेण्याबाबत प्राथमिक चर्चा सुरू आहे. जर ही युती आकाराला आली, तर चंद्रपूर महानगरपालिकेवर भगवा फडकणे निश्चित मानले जात आहे.
"आम्ही किंगमेकर नाही, तर किंग ठरणार!"
ठाकरे गटाचे जिल्हाप्रमुख संदीप गिरे आणि नवनिर्वाचित नगरसेवकांनी स्पष्ट केले आहे की, "जो पक्ष सन्मानाने महापौरपद देईल, त्याबाबतचा अंतिम निर्णय पक्षप्रमुख उद्धव साहेब ठाकरे घेतील." सध्या सर्व नगरसेवक मुंबईत दाखल झाले असून 'मातोश्री'वरून मिळणाऱ्या आदेशाकडे सर्वांचे लक्ष लागले आहे.
काँग्रेसची धाकधूक वाढली!
काँग्रेसने सर्वाधिक २७ जागा जिंकूनही सत्तेचा सोपान त्यांच्यासाठी कठीण झाला आहे. ठाकरे गट आणि वंचित बहुजन आघाडीने एकत्र येऊन आपली स्वतंत्र वज्रमुठ तयार केल्यामुळे काँग्रेस नेत्यांची झोप उडाली आहे. चंद्रपुरात आता 'विदर्भ पॅटर्न' राबवून भाजप आणि शिवसेना एकत्र येणार की शिवसेना आपला स्वतंत्र बाणा दाखवून नवीन समीकरण मांडणार, हे पाहणे औत्सुक्याचे ठरेल.
शिवसैनिकांमध्ये उत्साहाचे वातावरण
चंद्रपुरात गेल्या अनेक वर्षांपासून भाजपची सत्ता होती, मात्र या निवडणुकीत शिवसैनिकांनी दिलेल्या झुंजार लढतीमुळे भाजपला नमते घ्यावे लागत आहे. "ज्यांनी गद्दारी केली त्यांना धडा शिकवला, आता गड आमचाच!" अशा भावना स्थानिक शिवसैनिक व्यक्त करत आहेत.
