मुंबई, (प्रतिनिधी) २१ जुलै - सध्या देशात सुरू असलेल्या परीक्षांमधील सावळागोंधळ आणि विद्यार्थ्यांच्या आंदोलनावरून महाराष्ट्र नवनिर्माण सेनेचे अध्यक्ष राज ठाकरे यांनी केंद्र सरकारवर अत्यंत कठोर शब्दांत हल्लाबोल केला आहे. "लोकपाल विधेयकाच्या आंदोलनातून मिळवलेली सत्ता विद्यार्थ्यांच्याच आंदोलनातून जाणे निश्चित आहे," असा थेट इशारा देत राज ठाकरे यांनी विद्यार्थ्यांच्या रास्त मागण्यांना मनसेचा पूर्ण पाठिंबा जाहीर केला आहे. याशिवाय, अकार्यक्षम शिक्षणमंत्र्यांचा राजीनामा घेण्यात यावा आणि परीक्षांमध्ये पारदर्शकता आणली जावी, अशी मागणीही त्यांनी केली आहे.
"वांगचुक यांच्यावरील कारवाई अन् लाठीचार्ज म्हणजे सत्तेचा दर्प"
सोनम वांगचुक यांच्यावर झालेली कारवाई आणि आंदोलकांवर केलेल्या लाठीचार्जचा तीव्र निषेध करत राज ठाकरे म्हणाले, "सोनम वांगचुक यांना ज्या पद्धतीने रुग्णालयात दाखल करण्यात आले आणि त्यानंतर आंदोलकांवर बेफाम लाठीचार्ज झाला, त्यावरून सरकारची मानसिक स्थिती बिघडल्याचे दिसते. रास्त मागण्यांसाठीची आंदोलने निर्दयीपणे चिरडण्यात सरकारला पुरुषार्थ वाटत आहे."
शिक्षणमंत्री धर्मेंद्र प्रधान यांच्यावर निशाणा साधताना ते म्हणाले, "अकार्यक्षम मंत्र्यांचा राजीनामा घेणे म्हणजे सरकारला स्वतःचे अपयश वाटत आहे. 'आम्ही काय करायचे हे विरोधी पक्ष काय, जनतेनेही सांगायचे नाही' असा दर्प सध्याच्या सत्ताधीशांमध्ये निर्माण झाला आहे."
'परीक्षा पे चर्चा' करता, मग विद्यार्थ्यांच्या आक्रोशाकडे दुर्लक्ष का?
पंतप्रधान नरेंद्र मोदी यांच्यावर टीका करताना राज ठाकरे यांनी 'लेम डक' (Lame Duck) या इंग्रजी शब्दाचा संदर्भ दिला. "पंतप्रधानांचा प्रभाव कमी झालेला दिसत असून ते उत्तराधिकारी होण्याच्या स्पर्धेत असलेल्या शक्तींच्या दबावाखाली दिसत आहेत. पंतप्रधान 'परीक्षा पे चर्चा' करतात, मग आता प्रत्यक्ष रस्त्यावर उतरलेल्या विद्यार्थ्यांशी चर्चा का करत नाहीत? धर्मेंद्र प्रधान आणि सरकारचा अहंकार यापेक्षा देशातील लाखो विद्यार्थ्यांचा आक्रोश महत्त्वाचा आहे," असे ते म्हणाले.
"हे आंदोलन केवळ एका परीक्षेपुरते नाही; जनतेच्या नैराश्याचा उद्रेक!"
हे आंदोलन केवळ विद्यार्थ्यांचे नसून सरकारच्या एकूणच कारभाराविरोधातील जनतेचा उद्रेक असल्याचे राज ठाकरे यांनी स्पष्ट केले. "एकाच उद्योगपतीच्या घशात देश घालणे, महागाई, विकासकामांच्या नावाखाली होणारी जंगलतोड आणि शहरांची कोंडी या सर्व अन्यायाविरोधात हा जनआक्रोश आहे. श्रीलंकेतील २०२२ चे आंदोलन, २०११ चे 'अरब स्प्रिंग' किंवा जयप्रकाश नारायण यांचे 'संपूर्ण क्रांती' आंदोलन या सर्वांचा पाया विद्यार्थ्यांचा असंतोषच होता. त्यामुळे सरकारने निर्दयीपणा सोडून सामंजस्य दाखवावे," असा सल्ला त्यांनी दिला.
'नीट' (NEET) सारख्या केंद्रीय परीक्षांना मनसेने सुरुवातीपासूनच विरोध केला होता, याची आठवण करून देत राज ठाकरे यांनी विद्यार्थ्यांच्या या संघर्षाचे आणि धैर्याचे मनःपूर्वक कौतुक केले आहे.
