मुंबई, (प्रतिनिधी) २६ जून - पुणे जिल्ह्यातील ऐतिहासिक लोहगड किल्ला परिसरात नुकत्याच घडलेल्या एका युवकाच्या संशयास्पद मृत्यू प्रकरणाला आता मोठे वळण मिळाले आहे. या प्रकरणाची सखोल आणि निष्पक्ष चौकशी करण्यासाठी विशेष तपास पथक (SIT) नेमण्याचे कडक निर्देश तालिका अध्यक्ष राजू खरे यांनी आज विधानसभेत दिले. या निर्णयामुळे या प्रकरणातील दोषींवर लवकरच कठोर कारवाई होण्याचा मार्ग मोकळा झाला आहे.
विधानसभेत आमदार सुनील शेळके यांनी औचित्याचा मुद्दा उपस्थित करून या घटनेची गंभीरता सभागृहाच्या आणि सरकारच्या निदर्शनास आणून दिली. लोहगड किल्ला परिसरात झालेला हा मृत्यू केवळ अपघाती नसून, तो एका नियोजनबद्ध कटाचा भाग म्हणजेच 'हत्या' असल्याचा खळबळजनक आरोप आमदार शेळके यांनी केला. या घटनेमुळे मावळ परिसरासह संपूर्ण पुणे जिल्ह्यात नागरिकांमध्ये मोठी चिंता, भीती आणि संतापाचे वातावरण असल्याचे त्यांनी सभागृहात सांगितले.
घटनेचे गांभीर्य लक्षात घेऊन तत्काळ निर्देश
आमदार शेळके यांच्या मागणीची आणि परिस्थितीची गांभीर्यता लक्षात घेऊन तालिका अध्यक्ष राजू खरे यांनी या प्रकरणाची दखल घेतली. "लोहगड येथील घटना अत्यंत गंभीर स्वरूपाची आहे. या प्रकरणाच्या मुळाशी जाणे गरजेचे आहे," असे नमूद करत त्यांनी या संपूर्ण प्रकरणाचा तपास तात्काळ 'एसआयटी'कडे सोपवण्याचे निर्देश गृह विभाग आणि संबंधित यंत्रणांना दिले.
पर्यटन क्षेत्रातील सुरक्षेचा प्रश्न पुन्हा ऐरणीवर
लोहगड आणि विसापूर किल्ला परिसरात दरवर्षी लाखो पर्यटक येत असतात. मात्र, या भागात घडलेल्या या गंभीर प्रकरणामुळे पर्यटकांच्या आणि स्थानिक नागरिकांच्या सुरक्षेचा प्रश्न पुन्हा एकदा ऐरणीवर आला आहे. आता 'SIT' चौकशीच्या माध्यमातून या युवकाच्या मृत्यूमागचे नेमके गूढ काय होते आणि यामागे कोणाचा हात आहे, याचा पर्दाफाश होणार आहे.
