मुंबई, (प्रतिनिधी) २४ मे - मुंबईच्या छत्रपती शिवाजी महाराज आंतरराष्ट्रीय विमानतळावर महसूल गुप्तचर संचालनालयाच्या (DRI) मुंबई विभागीय पथकाने अंमली पदार्थ तस्करीविरुद्ध दोन मोठ्या कारवाया केल्या आहेत. या धडक मोहिमेत पथकाने तब्बल ११.२५ कोटी रुपये मूल्याचे २.२५ किलोग्रॅम कोकेन जप्त केले आहे. धक्कादायक बाब म्हणजे, हे ड्रग्ज शरीरामध्ये (पोटात) लपवून आणले गेले होते. याप्रकरणी चार परदेशी नागरिकांना ताब्यात घेण्यात आले असून त्यांना अटक करण्यात आली आहे.
पहिली कारवाई: शासकीय रुग्णालयात ८४ कॅप्सूल काढल्या बाहेर
मिळालेल्या खात्रीशीर गुप्त माहितीच्या आधारे, २२ मे २०२६ रोजी 'डीआरआय'च्या अधिकाऱ्यांनी अदीस अबाबा येथून मुंबईत आलेल्या एक महिला आणि एक पुरुष प्रवाशाला विमानतळावर रोखले. संशय आल्याने त्यांची कसून चौकशी करण्यात आली. सुरुवातीला टाळाटाळ करणाऱ्या या दोन्ही प्रवाशांनी अखेर अंमली पदार्थांनी भरलेल्या कॅप्सूल गिळल्याची कबुली दिली.
त्यानंतर त्यांना तात्काळ जवळच्या शासकीय रुग्णालयात दाखल करण्यात आले. डॉक्टरांच्या देखरेखीखाली त्यांच्या शरीरातून तब्बल ८४ कॅप्सूल हस्तगत करण्यात आल्या. या कॅप्सूलमधून अवैध बाजारात जवळपास ७ कोटी रुपये किंमत असलेले १.४० किलोग्रॅम कोकेन जप्त करण्यात आले.
दुसरी कारवाई: आफ्रिकन जोडप्याच्या पोटात ६३ कॅप्सूल
याआधी १९ मे २०२६ रोजीदेखील डीआरआयने अशाच पद्धतीची एक कारवाई केली होती. अदीस अबाबा येथूनच मुंबई विमानतळावर उतरलेल्या एका आफ्रिकन पुरुष आणि एका आफ्रिकन महिला प्रवाशाला अधिकाऱ्यांनी ताब्यात घेतले होते. चौकशीदरम्यान त्यांनीही पोटात कॅप्सूल असल्याचे मान्य केले. रुग्णालयात वैद्यकीय प्रक्रियेद्वारे त्यांच्या शरीरातून ६३ कॅप्सूल बाहेर काढण्यात आल्या. यात सुमारे ४.२५ कोटी रुपये किमतीचे ८५० ग्रॅम कोकेन आढळून आले.
NDPS कायद्यांतर्गत गुन्हा दाखल
डीआरआयने दोन्ही कारवायांमध्ये मिळून एकूण १४७ कॅप्सूल (२.२५ किलो कोकेन) जप्त केले आहे. हा सर्व साठा अंमली पदार्थ आणि अंमली द्रव्ये कायदा, १९८५ (NDPS Act) अंतर्गत जप्त करण्यात आला असून, चारही आंतरराष्ट्रीय तस्करांना गजाआड करण्यात आले आहे. या आंतरराष्ट्रीय रॅकेटची पाळेमुळे कुठेपर्यंत पसरली आहेत, याचा तपास आता अधिकारी करत आहेत.
'नशामुक्त भारत' संकल्पनेसाठी DRI कटिबद्ध
"नशामुक्त भारत घडवण्याच्या संकल्पावर डीआरआय ठाम आहे. अंमली पदार्थांची आंतरराष्ट्रीय तस्करी रोखणे, तस्करांचे जाळे उद्ध्वस्त करणे आणि देशाचे आरोग्य, कल्याण व सुरक्षा सुरक्षित ठेवण्यासाठी आमचे पथक सातत्याने आणि अत्यंत सतर्कतेने प्रयत्नशील आहे," अशी माहिती डीआरआयच्या वरिष्ठ अधिकाऱ्यांनी दिली.