अहिल्यानगर, (प्रतिनिधी) २२ मे - भारत सरकारच्या गृह मंत्रालयाच्या वतीने देशभर सुरू असलेल्या जगातील सर्वात मोठ्या डिजिटल जनगणना मोहिमेला अहिल्यानगर महानगरपालिका क्षेत्रात मोठा वेग आला आहे. मनपा आयुक्त तथा मुख्य जनगणना अधिकारी यशवंत डांगे यांच्या मार्गदर्शनाखाली ‘जनगणना- २०२७’ चे काम सध्या युद्धपातळीवर सुरू आहे. या मोहिमेत प्रत्येक प्रगणकाला ३० दिवसांचा कालावधी आणि निश्चित प्रभागनिहाय घरांची जबाबदारी देण्यात आलेली असताना, येथील दोन प्रगणकांनी मात्र कडक उन्हाची तमा न बाळगता वेळेच्या आधीच आपले काम १०० टक्के पूर्ण करून संपूर्ण राज्यासमोर कर्तव्यनिष्ठेचा एक नवा आदर्श निर्माण केला आहे.
प्रभाग समिती क्रमांक ०२, शहर विभागातील जनगणना २०२७ चे पर्यवेक्षक अनिल सुद्रिक यांच्या मार्गदर्शनाखाली कार्यरत असलेले प्रगणक अरुण मारुती पवार व सौ. श्रद्धा सुभाष कुलकर्णी अशी या विक्रमी कामगिरी करणाऱ्या कर्मचाऱ्यांची नावे आहेत. त्यांनी आपल्या वाट्याला आलेले जनगणनेचे काम अत्यंत अचूकपणे आणि शंभर टक्के पूर्ण करून एक वेगळाच मापदंड प्रस्थापित केला आहे.
आव्हानांवर मात करत 'HLO ॲप'चा प्रभावी वापर
सध्या मे महिन्याचा कडक उन्हाळा, वेळेचे कडक बंधन आणि डिजिटल जनगणनेच्या तांत्रिक प्रक्रियेची आव्हाने, अशा सर्व प्रतिकूल परिस्थितीवर या दोन्ही प्रगणकांनी यशस्वी मात केली. त्यांनी अत्यंत कमी कालावधीत संबंधित भागाचा नकाशा तयार करणे, घरांना क्रमांक देणे आणि केंद्र सरकारच्या अद्ययावत 'HLO ॲप'च्या साहाय्याने घरगणना प्रक्रिया कमालीच्या वेगाने आणि अचूकपणे पूर्ण केली. त्यांच्या या उल्लेखनीय कामगिरीची चर्चा आता संपूर्ण महानगरपालिका वर्तुळात सुरू आहे.
मनपा प्रशासनाकडून विशेष गौरव
या प्रेरणादायी कामगिरीची तातडीने दखल घेत अहिल्यानगर महानगरपालिकेचे अतिरिक्त आयुक्त नागेंद्र मुतकेकर तसेच सहायक आयुक्त मेहेर लहारे यांनी या दोन्ही प्रगणकांचा विशेष सत्कार करून त्यांना सन्मानित केले. "कडक उन्हात रस्त्यावर फिरत, प्रत्येक घरापर्यंत पोहोचत आणि वेळेची शर्यत जिंकत या प्रगणकांनी पूर्ण केलेली ही मोहीम कौतुकास्पद आहे. इतर प्रगणक आणि पर्यवेक्षकांसाठी हा एक उत्तम धडा आणि प्रेरणा आहे," अशा शब्दांत अतिरिक्त आयुक्तांनी त्यांचे कौतुक केले.
या संपूर्ण प्रक्रियेत या गटाला जनगणनेचे प्रभारी अधिकारी अजीम शेख यांचे मोलाचे मार्गदर्शन लाभले. "योग्य नियोजन, अपार मेहनत आणि आधुनिक तंत्रज्ञानाचा प्रभावी वापर असेल तर कोणतेही कठीण लक्ष्य सहज गाठता येते," हेच या प्रगणकांच्या कामगिरीतून पुन्हा एकदा सिद्ध झाले आहे. अहिल्यानगरच्या जनगणना मोहिमेत सध्या या विक्रमी कामगिरीचे जोरदार स्वागत होत असून, हा केवळ एक शासकीय कर्तव्याचा भाग नसून समर्पण आणि सांघिक कार्याचा एक उत्कृष्ट नमुना मानला जात आहे.