मुंबई, (प्रतिनिधी) २० मे - राज्यातील महायुती सरकार सत्तेत आल्यापासून सत्ताधारी पक्षातील ज्या निर्णयाकडे सर्व नेते आणि कार्यकर्त्यांचे डोळे लागून राहिले होते, त्या बहुप्रतिक्षित महामंडळ वाटपाचा मार्ग अखेर मोकळा झाला आहे. येत्या महिनाभरात राज्यातील महत्त्वाच्या महामंडळांच्या जागावाटपाची प्रक्रिया पूर्ण केली जाणार असून, यासाठी मुख्यमंत्री देवेंद्र फडणवीस यांनी स्वतः पुढाकार घेतला आहे. मुख्यमंत्र्यांनी भाजपसह मित्रपक्षांच्या नेत्यांना महामंडळांचे जागावाटप तातडीने पूर्ण करण्याच्या सूचना दिल्यामुळे महायुतीच्या गोटात सध्या आनंदाचे आणि मोर्चेबांधणीचे वातावरण निर्माण झाले आहे.
जागावाटपाचे ‘असे’ आहे पक्षांतर्गत सूत्र (फॉर्म्युला)
सूत्रांनी दिलेल्या विश्वासनीय माहितीनुसार, महायुतीमधील तीनही प्रमुख पक्षांमध्ये महामंडळ वाटपाचा फॉर्म्युला अंतिम झाला आहे. त्यानुसार खालीलप्रमाणे टक्केवारी निश्चित करण्यात आली आहे:
भारतीय जनता पक्ष (BJP) : ४८ टक्के महामंडळे
शिवसेना (शिंदे गट) : २९ टक्के महामंडळे
राष्ट्रवादी काँग्रेस (अजित पवार गट) : २० टक्के महामंडळे
उर्वरित ३ टक्के जागा महायुतीमधील इतर घटक पक्षांना दिल्या जाण्याची शक्यता आहे. मात्र, कोणत्या पक्षाच्या पदरात कोणते महामंडळ (उदा. सिडको, म्हाडा, एमएसआरटीसी) पडणार, हे अद्याप गुलदस्त्यात असून आगामी बैठकीत यावर अंतिम शिक्कामोर्तब होईल.
विधानपरिषद निवडणुकीनंतर सूत्रे फिरणार
सध्या राज्यात विधानपरिषदेच्या स्थानिक स्वराज्य संस्थेच्या १६ जागा आणि एका जागेवरील पोटनिवडणूक अशा एकूण १७ जागांसाठी राजकीय हालचाली वेगात सुरू आहेत. या निवडणुकीसाठी १८ जून रोजी मतदान तर २२ जून रोजी मतमोजणी होणार आहे.
ही निवडणूक बिनविरोध करण्यासाठी महायुतीचे प्रयत्न सुरू असून, तसे झाल्यास १८ जून रोजीच ही धामधूम संपेल. मात्र, मतदान घेण्याची वेळ आल्यास २२ जूनपर्यंत राजकीय डाव-प्रतिडाव पाहायला मिळतील. या निवडणुकीची प्रक्रिया पूर्ण होताच महामंडळ वाटपाच्या प्रक्रियेला कमालीचा वेग येणार आहे.
मुख्यमंत्री अन् उपमुख्यमंत्र्यांच्या बैठकीत अंतिम मंजुरी
महायुतीच्या आगामी उच्चस्तरीय बैठकीत महामंडळातील सदस्य आणि अध्यक्ष पदांच्या वाटपावर चर्चा होईल. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्या उपस्थितीत या यादीवर अंतिम शिक्कामोर्तब केले जाईल. त्यानंतर तिन्ही पक्षांचे प्रमुख आपापल्या कोट्यातील महामंडळांवर कोणत्या नेत्यांची आणि पदाधिकाऱ्यांची वर्णी लावायची, याचा निर्णय घेतील.
नेते 'देव पाण्यात बुडवून' बसले!
गेल्या अनेक महिन्यांपासून महामंडळाच्या प्रतीक्षेत असलेले महायुतीचे अनेक वरिष्ठ नेते आणि पदाधिकारी सध्या 'देव पाण्यात बुडवून' बसले आहेत. लाल दिवा आणि मानाचे पद मिळवण्यासाठी आतापासूनच नेत्यांनी मुंबईत वरिष्ठ पातळीवर मोर्चेबांधणी आणि लॉबिंग सुरू केले आहे. त्यामुळे आगामी काळात राज्याची आर्थिक नाडी असलेल्या महत्त्वाच्या महामंडळांची सूत्रे कोणाच्या हाती जातात, हे पाहणे औत्सुक्याचे ठरेल.