मुंबई, (प्रतिनिधी) १७ मे - राज्याला डिजिटल आणि तंत्रज्ञान क्षेत्रात जागतिक स्तरावर आघाडीवर नेण्यासाठी महाराष्ट्र सरकारने एक ऐतिहासिक झेप घेतली आहे. मुख्यमंत्री देवेंद्र फडणवीस यांच्या प्रमुख उपस्थितीत उद्योग विभाग आणि ‘एएम इंटेलिजन्स लॅब्ज प्रायव्हेट लिमिटेड’ (AM Intelligence Labs) यांच्यात तब्बल १ लाख १४ हजार कोटी रुपयांच्या गुंतवणुकीचा सामंजस्य करार (MoU) आज मंत्रालयात करण्यात आला. या महाप्रकल्पामुळे राज्यात ८ हजार प्रत्यक्ष आणि अप्रत्यक्ष रोजगाराच्या नव्या संधी उपलब्ध होणार आहेत.
MMR मध्ये उभारणार ‘एआय कॉम्प्युट हब’
या करारानुसार, मुंबई महानगर प्रदेशात (MMR) ‘इंटिग्रेटेड ग्रीन डेटा सेंटर पार्क’ आणि ‘एआय कॉम्प्युट हब’ उभारला जाणार आहे. या प्रकल्पाचे सर्वात मोठे वैशिष्ट्य म्हणजे हा संपूर्ण प्रकल्प 'अक्षय ऊर्जेवर' (Renewable Energy) आधारित असेल, ज्यामुळे पर्यावरणाची हानी टळेल. हा प्रकल्प ५०० मेगावॅट क्षमतेचा असून, यामध्ये २,५०,००० उच्च क्षमतेचे ‘एआय चिपसेट्स’ (AI Chipsets) वापरले जाणार आहेत.
प्रकल्पाचे टप्पे आणि रोजगाराची महासंधी
हा महाप्रकल्प दोन टप्प्यांत पूर्ण करण्याचे उद्दिष्ट ठेवण्यात आले आहे:
पहिला टप्पा (२०० मेगावॅट): सन २०२८ पर्यंत पूर्ण केला जाईल.
दुसरा टप्पा (३०० मेगावॅट): सन २०३० पर्यंत पूर्ण केला जाईल.
असा असेल रोजगार पॅटर्न:
या उच्च तंत्रज्ञान प्रकल्पामुळे महाराष्ट्रातील ८ हजार कुशल आणि निमकुशल तरुणांना रोजगार मिळेल. यात प्रामुख्याने सॉफ्टवेअर इंजिनिअर्स, डेटा सायंटिस्ट आणि ऑपरेशन्स टीमचा समावेश असेल. याशिवाय, प्रकल्पाच्या केवळ बांधकाम (Construction) कालावधीत आणखी २ हजार अतिरिक्त रोजगाराच्या संधी निर्माण होतील.
'माहिती तंत्रज्ञान धोरण २०२३' अंतर्गत मंजुरी
हा प्रकल्प राज्याच्या 'माहिती तंत्रज्ञान धोरण २०२३' तसेच 'हरित एकात्मिक डेटा सेंटर पार्क धोरण २०२४' च्या नियमांनुसार विकसित केला जात आहे. महाराष्ट्राला कृत्रिम बुद्धिमत्ता (AI) आणि डिजिटल इन्फ्रास्ट्रक्चरच्या क्षेत्रात राष्ट्रीय तसेच जागतिक पातळीवर अग्रस्थानी नेणे हा यामागचा मुख्य उद्देश आहे.
"हा प्रकल्प महाराष्ट्राच्या औद्योगिक आणि तंत्रज्ञान क्षेत्राचा कायापालट करणारा ठरेल. तंत्रज्ञानाच्या युगात महाराष्ट्र अव्वल स्थानी राहावा, यासाठी आम्ही सर्वोत्तम पायाभूत सुविधा देण्यास कटिबद्ध आहोत. या गुंतवणुकीमुळे राज्याच्या अर्थव्यवस्थेला मोठी ताकद मिळेल."
— देवेंद्र फडणवीस, (मुख्यमंत्री, महाराष्ट्र राज्य)
या करार सोहळ्याला उद्योग विभागाचे प्रधान सचिव डॉ. पी. अन्बळगण, उद्योग विकास आयुक्त दीपेंद्रसिंह कुशवाह, सहसचिव डॉ. श्रीकांत पुलकुंडवार, एएम इंटेलिजन्स लॅब्जचे अध्यक्ष अनिल चलमलाशेट्टी, संचालक मौर्य पायदा आणि उपाध्यक्ष पंकज कुमार यांसह अनेक वरिष्ठ अधिकारी उपस्थित होते.
?s=20