मुंबई, (प्रतिनिधी) २० मार्च - प्रसिद्ध सामाजिक कार्यकर्त्या अंजली दमानिया यांनी एका खळबळजनक पत्रकार परिषदेत अशोक खरात नावाच्या व्यक्तीने विणलेल्या फसवणुकीच्या जाळ्याचा पर्दाफाश केला आहे. अध्यात्म आणि चमत्काराच्या नावाखाली 'ओश्नो जल' आणि 'सिद्ध प्रे'च्या माध्यमातून राजकारण्यांना कशाप्रकारे भुरळ घातली गेली, याचे धक्कादायक वास्तव दमानियांनी समोर आणले आहे. या प्रकरणाचे धागेदोरे थेट मंत्रालयापासून ते बड्या देवस्थानच्या ट्रस्टींपर्यंत पोहचल्याचा दावा त्यांनी केला आहे.
काय आहे 'ओश्नो जल'चे वास्तव?
दमानिया यांच्या दाव्यानुसार, अशोक खरात हा एक विशेष प्रकारचे पाणी तयार करत असे, ज्याला तो 'ओश्नो जल' म्हणायचा. हे जल म्हणजे कोणतेही आध्यात्मिक तीर्थ नसून कफ सिरप, पाणी आणि कुटून टाकलेल्या 'वायग्रा' (Viagra) गोळ्यांचे मिश्रण असायचे. हे जल प्राप्त करण्यासाठी महाराष्ट्रातील विविध पक्षांचे बडे नेते चक्क आपली खाजगी वाहने आणि हेलिकॉप्टर खरातकडे पाठवायचे, असा गंभीर आरोप दमानिया यांनी केला आहे. यामध्ये तिरुपती बालाजी ट्रस्टच्या एका ट्रस्टीचाही समावेश असल्याचे त्यांनी नमूद केले.
संमोहन आणि अंधश्रद्धेचा बनाव
लोकांना आपल्या प्रभावाखाली घेण्यासाठी खरात दोन प्रकारच्या 'साधना'चा वापर करत असे:
१. ओश्नो प्रे: 'ओम ईशान्येश्वराय नम:' या मंत्राचा ११ वेळा जप करायला सांगून लोकांना भारावून टाकले जाई. श्रावण महिन्यात आणि महाशिवरात्रीला शंकराच्या पिंडीवरील हंडा आपोआप हलतो, असा बनाव रचून लोकांच्या प्रश्नांची उत्तरे दिली जात असत.
२. सिद्ध प्रे: होम-हवन सुरू असताना भक्तांना सापांचे आवाज येणे किंवा विचित्र आकार दिसणे, असे अनुभव येत. दमानिया यांच्या मते, हा सर्व प्रकार निव्वळ 'हिप्नोसिस' (संमोहन) असून त्याद्वारे खरात लोकांच्या मानसिकतेवर नियंत्रण मिळवत असे.
अनेक पक्षांचे नेते रडारवर
या प्रकरणात केवळ एका विशिष्ट पक्षाचे नेते नसून, सत्ताधारी आणि विरोधी अशा दोन्ही बाजूंच्या अनेक नेत्यांचा समावेश असल्याचा दावा करण्यात आला आहे. "अध्यात्म आणि श्रद्धेचा बाजार मांडून सुशिक्षित नेत्यांनाही कशाप्रकारे लुबाडले गेले, हे यावरून स्पष्ट होते," असे दमानिया यांनी म्हटले आहे.
या प्रकरणाच्या सखोल चौकशीची मागणी आता जोर धरत असून, राजकीय वर्तुळात मोठी खळबळ उडाली आहे. अशोक खरातने उभारलेले हे साम्राज्य नेमके किती मोठे आहे आणि यात कोणाकोणाचे हितसंबंध गुंतले आहेत, हे पाहणे आता महत्त्वाचे ठरेल.