पुणे, (प्रतिनिधी) ९ मार्च - मार्च महिन्याच्या सुरुवातीलाच महाराष्ट्रात उन्हाच्या झळा तीव्र झाल्या असून, भारतीय हवामानशास्त्र विभागाने (IMD) राज्यातील अनेक जिल्ह्यांसाठी उष्णतेच्या लाटेचा (Heatwave) इशारा दिला आहे. आज, ९ मार्च रोजी राज्यातील १० जिल्ह्यांमध्ये 'यलो अलर्ट' जारी करण्यात आला असून, नागरिकांना काळजी घेण्याचे आवाहन करण्यात आले आहे.
विदर्भात सर्वाधिक उष्णता
राज्यात सध्या विदर्भ आणि उत्तर महाराष्ट्रात तापमानाचा पारा वेगाने वाढत आहे. रविवारी अकोला जिल्ह्यात ४०.९ अंश सेल्सिअस इतक्या उच्चांकी तापमानाची नोंद झाली. विदर्भातील अनेक भागांत पारा ४० अंशांच्या पुढे गेला असून, आगामी दोन-तीन दिवस ही स्थिती कायम राहण्याची शक्यता आहे.
या जिल्ह्यांना 'यलो अलर्ट'
हवामान विभागाने दिलेल्या माहितीनुसार, आज (९ मार्च) खालील जिल्ह्यांत उष्णतेच्या लाटेचा प्रभाव जाणवेल:
कोकण: ठाणे, पालघर.
उत्तर महाराष्ट्र: नाशिक, जळगाव, धुळे, नंदुरबार.
मराठवाडा: छत्रपती संभाजीनगर, जालना.
विदर्भ: अकोला, अमरावती.
उद्या, १० मार्च रोजी देखील बीड, अहिल्यानगर, परभणी आणि वर्धा या जिल्ह्यांमध्ये उष्णतेचा कडाका वाढणार आहे. १२ मार्चनंतर या उष्णतेच्या लाटेची तीव्रता कमी होण्याची शक्यता वर्तवण्यात आली आहे.
पुण्यातही उकाडा वाढला
पुणे शहरात अधिकृतपणे उष्णतेच्या लाटेचा इशारा नसला तरी, कमाल तापमानात मोठी वाढ झाली आहे. रविवारी शिवाजीनगर येथे ३७.१ अंश सेल्सिअस तापमानाची नोंद झाली, जे सरासरीपेक्षा २.५ अंशांनी जास्त होते. लोहगाव परिसरात पारा ३८.९ अंशांपर्यंत पोहोचला आहे. आगामी २४ तास आकाश निरभ्र राहील, मात्र १० मार्चनंतर दुपारच्या वेळी अंशतः ढगाळ वातावरण राहण्याची शक्यता हवामान तज्ज्ञ एस. डी. सानप यांनी वर्तवली आहे.
उष्माघातापासून बचावासाठी मार्गदर्शक सूचना:
१. दुपारच्या वेळी (१२ ते ४) विनाकारण घराबाहेर पडणे टाळा.
२. पुरेशा प्रमाणात पाणी प्या आणि शरीरातील पाण्याचे प्रमाण संतुलित ठेवा.
३. सुती आणि हलक्या रंगाचे कपडे परिधान करा.
४. बाहेर जाताना टोपी, छत्री किंवा रुमालाचा वापर करा.