नाशिक, (प्रतिनिधी) दि.१३ जानेवारी २०२६:- "येणाऱ्या काळात नाशिकचा चौफेर विकास साधण्यासाठी आणि शहराला प्रगतीची नवी दिशा देण्यासाठी राष्ट्रवादी काँग्रेस पार्टी, शिवसेना व रिपब्लिकन सेना युती कटिबद्ध आहे. शिक्षण, आरोग्य आणि पायाभूत सुविधांमध्ये आमूलाग्र बदल घडवून नाशिकला विकासाची नवी भरारी घ्यायची आहे," असा विश्वास राष्ट्रवादी काँग्रेसचे स्टार प्रचारक आणि माजी खासदार समीर भुजबळ यांनी व्यक्त केला. नाशिक महानगरपालिका निवडणुकीत युती उमेदवारांच्या प्रचाराची सांगता करताना त्यांनी मतदारांशी संवाद साधला.
हरित नाशिकचे व्हिजन
माजी खासदार समीर भुजबळ यांनी नाशिकच्या भविष्यासाठी आपले व्हिजन मांडताना सांगितले की, रस्ते, पाणी आणि वीज यांसारख्या नागरिकांच्या जिव्हाळ्याच्या प्रश्नांवर पुन्हा तक्रार करण्याची वेळ येऊ नये, असे चित्र आपल्याला निर्माण करायचे आहे. केवळ मूलभूत सुविधाच नव्हे, तर पर्यावरण, पर्यटन, स्वच्छता, साहित्य-संस्कृती, क्रीडा आणि महिला - बालकल्याण अशा सर्वच क्षेत्रांत नाशिकला अग्रस्थानी नेण्याचा मानस त्यांनी व्यक्त केला.
सिंहस्थ कुंभमेळ्याचे आव्हान आणि विकास
आगामी सिंहस्थ कुंभमेळा ही नाशिकसाठी मोठी संधी आहे. शहराच्या विकासाची हीच ती वेळ असून,नाशिकची आंतरराष्ट्रीय ओळख अधिक प्रबळ करण्यासाठी योग्य निर्णयाची गरज असल्याचे त्यांनी अधोरेखित केले. "नाशिकची भविष्यातील भरारी लक्षात घेऊन सुजाण मतदार योग्य तो निर्णय घेतील, याची मला खात्री आहे," असेही माजी खासदार समीर भुजबळ म्हणाले.
महायुतीच्या विजयाचा विश्वास
यावेळी त्यांनी राष्ट्रवादी काँग्रेस पार्टी,शिवसेना आणि रिपब्लिकन सेना युतीच्या उमेदवारांना विजयी करण्याचे आवाहन केले. येत्या १५ जानेवारी रोजी होणाऱ्या मतदानावेळी 'घड्याळ'व धनुष्यबाण या चिन्हासमोरील बटण दाबून उमेदवारांना प्रचंड मताधिक्याने विजयी करावे, जेणेकरून विजयी उमेदवारांसह प्रत्यक्ष कामाला गतीने सुरुवात करता येईल, असे आवाहन त्यांनी नाशिककरांना केले.
मंत्री छगन भुजबळ साहेबांच्या मार्गदर्शन व संकल्पनेतून नाशकात साकारलेल्या प्रकल्पांची उत्तम देखभाल आणि नवीन प्रकल्प साकारणे यासाठी उत्साही आणि सर्वोत्तम व्यक्तीची गरज आहे. सुजाण नाशिककर नक्कीच राष्ट्रवादी काँग्रेस पार्टी-शिवसेना-रिपब्लिकन सेना युतीची निवड करतील, अशी मला खात्री आहे.
- माजी खासदार समीर भुजबळ, स्टार प्रचारक, राष्ट्रवादी काँग्रेस पार्टी