मनोहर शिंदे, (नाशिक) ४ जुलै - अंबड येथील शांतीनगरमधील बेघर झालेल्या नागरिकांनी पुकारलेल्या बेमुदत 'बिर्हाड आंदोलना'ला अखेर मोठे यश आले आहे. राज्याचे उद्योगमंत्री डॉ. उदय सामंत यांनी या संवेदनशील प्रकरणात सकारात्मक मध्यस्थी करत आंदोलन स्थगित करण्याचे आवाहन केले. मुख्यमंत्र्यांशी चर्चा करून या नागरिकांना स्वतंत्र घरे मिळवून देण्याची तरतूद करण्यात आली असून, तात्कालिक व्यवस्था म्हणून जिल्हा प्रशासनाने वखार महामंडळाच्या जागेत त्यांची राहण्याची व प्रवासाची सोय केली आहे.
मुख्यमंत्र्यांसोबत मंत्रालयात तातडीची बैठक
या आंदोलनाची गांभीर्य लक्षात घेऊन मंत्री डॉ. उदय सामंत यांनी मंत्रालयात मुख्यमंत्री व उपमुख्यमंत्र्यांसोबत एक विशेष बैठक घेतली. शांतीनगरवासीयांच्या मागण्या रास्त असल्याचे स्पष्ट करत डॉ. सामंत म्हणाले, "आंदोलकांच्या तीन प्रमुख मागण्या राजकीय नसून अत्यंत न्याय्य आहेत. म्हणूनच आम्ही यावर तातडीने मार्ग काढण्याचा निर्णय घेतला. सध्या तात्पुरत्या स्वरूपात १ एकर जागा उपलब्ध करून देण्यात आली असून, कायमस्वरूपी घरांची फाईल वेगाने पुढे सरकवली जात आहे."
जिल्हाधिकारी आयुष प्रसाद यांना तातडीचे निर्देश
आंदोलक कुटुंबांना तूर्तास वखार महामंडळाच्या (Warehouse Corporation) जागेत स्थलांतरित करण्यात येत आहे. तिथे त्यांच्या राहण्याची आणि मूलभूत सुविधांची योग्य व्यवस्था करण्याचे निर्देश जिल्हाधिकारी आयुष प्रसाद यांना देण्यात आले आहेत. तसेच, नागरिकांना तिथपर्यंत पोहोचवण्यासाठी प्रशासनातर्फे तात्काळ बसेसची सोयही करण्यात आली आहे.
लोकप्रतिनिधी आणि पदाधिकाऱ्यांची उपस्थिती
या गंभीर समस्येकडे शासनाचे लक्ष वेधण्यासाठी आमदार सरोज अहिरे यांनी मुख्यमंत्री आणि मंत्र्यांना सविस्तर निवेदन दिले होते. आंदोलनाच्या यशस्वीतेनंतर प्रशांत खरात यांनी सर्व सहकाऱ्यांचे व प्रशासनाचे आभार मानले.
यावेळी माजी नगरसेवक नितीन दातीर, विलास शिंदे, अजय बोरस्ते, विलास आरोटे, बंटी तिदमे, लक्ष्मी ताठे, रवी अहिरे, अजय क्षीरसागर यांच्यासह मोठ्या संख्येने शांतीनगरचे आंदोलक नागरिक उपस्थित होते. शासनाच्या या सकारात्मक निर्णयामुळे बेघर कुटुंबांना मोठा दिलासा मिळाला असून परिसरातून समाधान व्यक्त होत आहे.
