मुंबई, (प्रतिनिधी) ९ जून - राष्ट्रवादी काँग्रेस पक्षाकडून (अजित पवार गट) सुनेत्रा पवार यांच्या रिक्त जागी राजेंद्र जैन यांना राज्यसभेची उमेदवारी जाहीर झाल्यानंतर, ज्येष्ठ नेते छगन भुजबळ यांच्या नाराजीची जोरदार चर्चा रंगली होती. राष्ट्रवादीची ही जागा भुजबळ कुटुंबाला मिळावी आणि पुतण्या समीर भुजबळ यांना राज्य मंत्रिमंडळात मंत्रिपदाची संधी दिली जावी, अशी मागणी छगन भुजबळ यांनी लावून धरली होती. मात्र, तांत्रिक कारणांमुळे ही मागणी सध्यातरी वेटींगवर पडल्याचे चित्र आहे. या सर्व पार्श्वभूमीवर, आता खुद्द माजी खासदार समीर भुजबळ यांनी या राजकीय घडामोडींमागील खरी 'इनसाईड स्टोरी' सांगत मोठा खुलासा केला आहे.
"वेळ कमी असल्याने शपथविधी झाला नाही, पण शब्द मिळालाय!"
पक्षात किंवा महायुतीत आपण अजिबात नाराज नसल्याचे स्पष्ट करत समीर भुजबळ यांनी मंत्रिपदाच्या चर्चेबाबत सांगितले:
"मी नाराज नाही. मुख्यमंत्र्यांसोबत मंत्रिपदाबाबत सकारात्मक चर्चा झाली होती. मात्र, मंत्रिपदाच्या शपथेसाठी त्यावेळी वेळ अतिशय कमी होता, त्यामुळे तो शपथविधी पार पडू शकला नाही. परंतु, भाजपकडून तसा शब्द देण्यात आला आहे. ज्यावेळी आगामी काळात मंत्रिमंडळाचा विस्तार होईल किंवा मंत्रिमंडळात फेरबदल केले जातील, त्यावेळी मला नक्कीच संधी दिली जाईल."
"माझा राज्यसभेवर जाण्याचा विषयच नव्हता!"
छगन भुजबळ यांच्या दिल्लीतील इच्छेबाबत बोलताना समीर भुजबळ म्हणाले की, "मंत्री छगन भुजबळ यांची संसदेत (दिल्लीत) काम करण्याची खूप आधीपासून इच्छा आहे. यापूर्वी दोन ते तीन वेळा तशी संधी चालूनही आली होती, मात्र काही राजकीय कारणांमुळे ते शक्य झाले नाही. त्यामुळे यंदाच्या वेळी माझा राज्यसभेवर जाण्याचा अजिबात विषय नव्हता, ती साहेबांचीच (छगन भुजबळ) इच्छा होती."
पक्षासाठी २५ वर्षांचे योगदान; चिन्हापासून ते सभांच्या नियोजनापर्यंत!
स्वतःच्या राजकीय हक्कावर आणि दाव्यावर बोलताना समीर भुजबळ यांनी आपल्या २५ वर्षांच्या राजकीय प्रवासाची आठवण करून दिली. ते म्हणाले:
सुरुवात शिवसैनिक म्हणून: "मी लहानपणापासून राजकारणात सक्रिय आहे. आधी शिवसैनिक म्हणून काम केले. त्यानंतर छगन भुजबळ साहेबांसोबत मी राष्ट्रवादी काँग्रेसमध्ये आलो."
पक्षाची उभारणी: "१९९९ सालापासून मी पक्षात झटत आहे. पक्षाचा झेंडा बनवणे, निवडणूक चिन्ह ठरवणे, मुंबईतील षण्मुखानंद हॉल आणि दादरच्या शिवाजी पार्क मैदानातील ऐतिहासिक सभांचे आयोजन करणे, तसेच राज्यभरातील सभांचे नियोजन करणे, ही सगळी महत्त्वाची कामे मी पडद्यामागे राहून केली आहेत."
संधी मिळण्यास अडचण नाही: "आज २५ वर्षांपेक्षा जास्त काळ मी राष्ट्रवादीसोबत एकनिष्ठ राहून काम करत आहे. त्यामुळे मला भविष्यात राज्याच्या राजकारणात मोठी संधी मिळायला काहीच अडचण नाही."
भुजबळांची मागणी तूर्तास वेटींगवर; राजेंद्र जैन बिनविरोध
राज्यसभा निवडणुकीत राष्ट्रवादीने अखेर प्रफुल पटेल यांचे निकटवर्तीय राजेंद्र जैन यांना संधी दिली असून, त्यांची राज्यसभेवर बिनविरोध निवड झाली आहे. दुसरीकडे, विधान परिषद निवडणुकीत पक्षाचे प्रदेशाध्यक्ष सुनील तटकरे यांचे सुपुत्र अनिकेत तटकरे यांनाही बिनविरोध निवडून आणले आहे. "इतर नेत्यांच्या मुला-बाळांना जो न्याय मिळतो, तोच न्याय मलाही मिळावा," अशी छगन भुजबळ यांची जाहीर मागणी होती. आता समीर भुजबळ यांना मिळालेल्या 'शब्दा'नुसार मंत्रिमंडळ विस्तारात त्यांना स्थान मिळते का, याकडे संपूर्ण राज्याचे लक्ष लागले आहे.
