नवी दिल्ली, (प्रतिनिधी) १ जून - देशाची राजधानी दिल्ली येथील केंद्रीय शिक्षण मंत्रालयाच्या कार्यालयाला अचानक लागलेल्या आगीमुळे राजकीय आणि शैक्षणिक वर्तुळात प्रचंड खळबळ उडाली आहे. ही आग केवळ एक अपघात आहे की केंद्रीय शिक्षण मंत्री धर्मेंद्र प्रधान यांचे कथित 'काळे कारनामे' आणि परीक्षांमधील घोटाळ्यांचे पुरावे नष्ट करण्यासाठी जाणीवपूर्वक घडवून आणलेला घातपात आहे? असा संतप्त आणि थेट सवाल आता देशभरातील विद्यार्थ्यांनी उपस्थित केला आहे. सोशल मीडियासह विविध माध्यमांतून या आगीच्या चौकशीची आणि शिक्षण मंत्र्यांच्या राजीनाम्याची मागणी जोर धरू लागली आहे.
पुरावे नष्ट करण्यासाठी आग लावली की लागली?
गेल्या काही काळापासून राष्ट्रीय परीक्षा एजन्सी (NTA) द्वारे आयोजित 'NEET', 'CUET (UG)' आणि 'CBSE' इयत्ता १२ वीच्या परीक्षांमधील कथित गैरव्यवहार आणि गोंधळामुळे शिक्षण मंत्रालय आधीच वादाच्या भोवऱ्यात सापडले आहे. या परीक्षांमधील कथित घोळामुळे देशातील जवळपास ४५ लाख विद्यार्थ्यांचे भवितव्य टांगणीला लागल्याचा आरोप विद्यार्थी संघटना करत आहेत.
हा संपूर्ण वाद आणि घोटाळ्याशी संबंधित महत्त्वाचे दस्तऐवज बाहेर येऊ नयेत, म्हणूनच तर ही आग 'लावली गेली नाही ना?' अशी शंका विद्यार्थ्यांकडून व्यक्त केली जात आहे. "मंत्रालयाच्या कार्यालयाला आग लागली की लावली गेली, हे सत्य देशासमोर यायलाच हवे," अशी मागणी आता सोशल मीडियावर 'ट्रेन्ड' होत आहे.
पंतप्रधान कार्यालयाकडे (PMO) थेट दाद; 'या' प्रमुख मागण्या:
देशभरातील विद्यार्थी आणि पालकांनी या घटनेची गंभीर दखल घेत 'पंतप्रधान कार्यालयाकडे' (PMO) थेट हस्तक्षेप करण्याची मागणी केली असून खालील मागण्या लावून धरल्या आहेत:
मंत्र्यांचा राजीनामा: ४५ लाख विद्यार्थ्यांच्या भविष्याशी खेळ करणारे आणि परीक्षा यंत्रणेवरील नियंत्रण गमावलेले केंद्रीय शिक्षण मंत्री धर्मेंद्र प्रधान यांचा केंद्र सरकारने तात्काळ राजीनामा घ्यावा.
NTA वर कारवाई: 'नॅशनल टेस्टिंग एजन्सी' (NTA) मधील ज्या दोषी अधिकाऱ्यांच्या निष्काळजीपणामुळे किंवा संगनमताने परीक्षांमध्ये मोठे घोळ झाले, त्यांच्यावर कठोरात कठोर कायदेशीर कारवाई करण्यात यावी.
आगीची उच्चस्तरीय चौकशी: शिक्षण मंत्रालयातील आगीच्या घटनेची तातडीने निष्पक्ष आणि उच्चस्तरीय चौकशी करून आगीचे नेमके कारण स्पष्ट केले जावे.
सोशल मीडियावर आंदोलनाचा भडका
या घटनेनंतर ट्विटर (X) आणि इतर सोशल मीडिया प्लॅटफॉर्मवर #MinistryOfEducation, #EducationScam, #NEETExam आणि #ResignDharmendraPradhan या हॅशटॅगसह विद्यार्थ्यांचा तीव्र आक्रोश पाहायला मिळत आहे. विरोधी पक्षांनीही या मुद्द्यावरून केंद्र सरकारला घेरण्याची तयारी सुरू केली असून, या आगीच्या निमित्ताने देशातील परीक्षा घोटाळ्याचा मुद्दा पुन्हा एकदा राष्ट्रीय पातळीवर तापण्याची चिन्हे आहेत.
?s=20