पुणे, (प्रतिनिधी) १५ मे - राज्याचे उपमुख्यमंत्री अजित पवार यांच्या निधनानंतर महाराष्ट्राच्या राजकारणात मोठी पोकळी निर्माण झाली असून, आता राष्ट्रवादी काँग्रेसमध्ये मोठ्या राजकीय घडामोडींना वेग आला आहे. अजित पवारांच्या निधनानंतर त्यांच्या गटाची सूत्रे सुनेत्रा पवार यांनी हाती घेतली असली, तरी आता दोन्ही राष्ट्रवादी काँग्रेसच्या विलीनीकरणाची चर्चा पुन्हा एकदा ऐरणीवर आली आहे. पुण्यात पार पडलेल्या शरद पवार गटाच्या 'गुप्त बैठकी'मुळे राजकीय वर्तुळात चर्चांना उधाण आले आहे.
पुण्याच्या हॉटेलमध्ये प्रमुख नेत्यांची खलबतं
राष्ट्रवादी काँग्रेस शरद पवार गटाच्या प्रमुख नेत्यांची एक महत्त्वाची आणि गुप्त बैठक पुण्यात पार पडली. ही बैठक पक्षाच्या अधिकृत कार्यालयात न होता एका खासगी हॉटेलमध्ये पार पडल्याने तिला विशेष महत्त्व प्राप्त झाले आहे. या बैठकीला माजी मंत्री अनिल देशमुख, खासदार अमोल कोल्हे, हर्षवर्धन पाटील, प्रदेशाध्यक्ष शशिकांत शिंदे, जयंत पाटील, राजेश टोपे आणि बाळासाहेब पाटील यांसारखे दिग्गज नेते उपस्थित होते. या बैठकीत विलीनीकरणाच्या मुद्द्यावर सविस्तर चर्चा झाल्याची प्राथमिक माहिती मिळत आहे.
सुनील तटकरेंच्या भेटीने भुवया उंचावल्या
दोन दिवसांपूर्वीच अजित पवार गटाचे नेते सुनील तटकरे यांनी तब्बल दोन वर्षांनंतर शरद पवार यांची भेट घेतली होती. ही भेट केवळ प्रकृतीची विचारपूस करण्यासाठी असल्याचे तटकरेंनी सांगितले असले, तरी पुण्याच्या बैठकीत या भेटीवरही चर्चा झाली. तटकरे आणि पवार यांच्या भेटीनंतर विलीनीकरणाच्या चर्चांना अधिक बळ मिळाले आहे.
नेत्यांची विसंगत विधाने आणि सोशल मीडियावरील फोटो
शरद पवार यांनी विलीनीकरणाबाबत चर्चा सुरू असल्याचे संकेत दिले होते, तर रोहित पवार यांनीही अनेकदा याबाबत भाष्य केले आहे. मात्र, अजित पवार गटाच्या नेत्यांनी सुरुवातीला असे काहीही नसल्याचे स्पष्ट केले होते. सुनेत्रा पवार यांनी या संवेदनशील विषयावर अद्याप कोणतेही भाष्य केलेले नाही. अशातच पुण्याच्या बैठकीनंतरचा एक फोटो सोशल मीडियावर व्हायरल झाल्याने "दोन्ही राष्ट्रवादी पुन्हा एकत्र येणार का?" असा प्रश्न उपस्थित केला जात आहे.
काय होणार पुढचा निर्णय?
विलीनीकरणाबाबत शरद पवार गटाकडून सातत्याने सकारात्मकता दर्शवली जात आहे. मात्र, सुनेत्रा पवार यांच्या नेतृत्वाखालील गट काय भूमिका घेतो, याकडे सर्वांचे लक्ष लागले आहे. जर दोन्ही गट एकत्र आले, तर महाराष्ट्राच्या राजकारणातील हे सर्वात मोठे सत्तांतर ठरू शकते.