मुंबई, (प्रतिनिधी) ६ मे - महाराष्ट्र राज्य शिक्षण मंडळाच्या वतीने इयत्ता दुसरी, तिसरी आणि चौथीच्या नवीन अभ्यासक्रमाला आधीच हिरवा कंदील मिळाला होता. आता त्यासोबतच इयत्ता सहावीच्या नवीन अभ्यासक्रम आराखड्यालाही राज्यस्तरीय सुकाणू समितीने मंजुरी दिली आहे. शालेय शिक्षण मंत्री दादाजी भुसे यांनी ही माहिती दिली असून, येत्या जूनपासून सुरू होणाऱ्या शैक्षणिक सत्रापासूनच हा बदल लागू होणार आहे.
मुंबईतील महाराष्ट्र प्राथमिक शिक्षण परिषदेच्या कार्यालयात मंत्री दादाजी भुसे यांच्या अध्यक्षतेखाली महत्त्वाची बैठक पार पडली. या बैठकीत सहावीचा अभ्यासक्रम आराखडा अंतिम करण्यात आला.
अध्ययन निष्पत्तीवर भर
नवीन अभ्यासक्रम हा राष्ट्रीय शैक्षणिक धोरणानुसार (NEP) तयार करण्यात आला आहे. विषयांची काठिण्यपातळी आणि विद्यार्थ्यांची अध्ययन निष्पत्ती (Learning Outcomes) लक्षात घेऊन हा आराखडा निश्चित केला आहे. शिक्षण आयुक्तांकडील समन्वय समितीच्या अंतिम मान्यतेनंतर, 'बालभारती'कडून या वर्गांची पाठ्यपुस्तके तातडीने छापली जातील आणि जूनपर्यंत ती विद्यार्थ्यांच्या हाती पोहोचतील, अशी ग्वाही मंत्र्यांनी दिली.
शिक्षकांचे प्रशिक्षण याच महिन्यात
केवळ अभ्यासक्रम बदलून न थांबता, तो शिकवण्याच्या पद्धतीबाबतही सरकार पावले उचलत आहे.
राज्यस्तरीय प्रशिक्षण: दुसरी, तिसरी आणि चौथीच्या नव्या पुस्तकांनुसार शिक्षकांना कसे शिकवावे, याचे मुख्य प्रशिक्षण 'एससीईआरटी'तर्फे याच महिन्यात आयोजित केले आहे.
जिल्हास्तरीय टप्पा: राज्यस्तरानंतर जिल्हास्तरावर शिक्षकांचे प्रशिक्षण पूर्ण केले जाणार आहे.
बैठकीला उपस्थित मान्यवर
या बैठकीस शालेय शिक्षण राज्यमंत्री डॉ. पंकज भोयर, प्रधान सचिव रणजितसिंह देओल, शिक्षण आयुक्त सच्चिंद्रप्रताप सिंह, राज्य शिक्षण मंडळाचे अध्यक्ष त्रिगुण कुलकर्णी, 'एससीईआरटी'चे संचालक डॉ. हेमंत वसेकर यांच्यासह शिक्षण विभागातील वरिष्ठ अधिकारी उपस्थित होते.
थोडक्यात महत्वाचे...
इयत्ता २ री, ३ री, ४ थी आणि ६ वीचा अभ्यासक्रम बदलणार.
जून २०२६ पासून नवीन पुस्तके लागू होणार.
पाठ्यपुस्तके 'बालभारती'मार्फत तातडीने उपलब्ध करून देणार.
शिक्षकांच्या प्रशिक्षणाचे नियोजन पूर्ण.