नाशिक, (प्रतिनिधी) ९ एप्रिल - नाशिकमधील एका नामांकित बहुराष्ट्रीय आयटी (IT) कंपनीत नोकरी करणाऱ्या तरुणींचे लैंगिक शोषण करून त्यांचे बळजबरीने धर्मांतर करण्याचा खळबळजनक प्रकार उघडकीस आला आहे. या घटनेचे तीव्र पडसाद उमटले असून, राज्याचे उपमुख्यमंत्री तथा गृहमंत्री देवेंद्र फडणवीस यांनी हे प्रकरण अत्यंत ‘धक्कादायक आणि गंभीर’ असल्याचे म्हटले आहे. या प्रकरणाच्या सखोल तपासासाठी विशेष तपास पथकाची (SIT) स्थापना करण्यात आली असून ५ संशयितांना बेड्या ठोकल्या आहेत.
नेमकं प्रकरण काय?
मिळालेल्या माहितीनुसार, संबंधित नामांकित कंपनीत बेरोजगार तरुणींना नोकरीचे आमिष दाखवून भरती केले जात होते. एकदा तरुणी रुजू झाल्या की, कंपनीतील ‘टीम लीडर्स’ आणि वरिष्ठ अधिकाऱ्यांकडून त्यांच्यावर जाळे टाकले जात असे. पीडित तरुणींनी दिलेल्या जबानीनुसार, हिंदू देव-देवतांबद्दल आक्षेपार्ह विधाने करून आणि एका विशिष्ट धर्माची श्रेष्ठता पटवून देऊन त्यांचे मतपरिवर्तन करण्याचा प्रयत्न केला जात होता. इतकेच नव्हे तर, वरिष्ठ अधिकाऱ्यांकडून तरुणींचे लैंगिक शोषण करून त्यांच्यावर धर्मांतरासाठी सतत दबाव टाकला जात होता. एका पीडित तरुणीने धाडस दाखवून तक्रार केल्याने या मोठ्या रॅकेटचा पर्दाफाश झाला.
पाच जणांना कोठडी, १२ अधिकाऱ्यांची एसआयटी
या प्रकरणी पोलिसांनी आतापर्यंत आसिफ अन्सारी, शफी शेख, शाहरुख कुरेशी, रझा मेमन आणि तौसिफ अत्तार या पाच संशयितांना अटक केली आहे. न्यायालयाने त्यांना १० एप्रिलपर्यंत पोलीस कोठडी सुनावली आहे. या प्रकरणाचे गांभीर्य लक्षात घेऊन गुन्हे शाखेचे सहाय्यक पोलीस आयुक्त संदीप मिटके यांच्या नेतृत्वाखाली १२ पोलीस अधिकाऱ्यांचे SIT पथक नेमण्यात आले आहे. हे आरोपी स्थानिक असले तरी त्यांचे संबंध एखाद्या आंतरराष्ट्रीय किंवा कट्टरपंथी संघटनेशी आहेत का, याचा तपास हे पथक करणार आहे.
हे अतिशय गंभीर प्रकरण - देवेंद्र फडणवीस
या प्रकरणावर बोलताना गृहमंत्री फडणवीस म्हणाले की, "एका टेक्नॉलॉजी कंपनीमध्ये अशा प्रकारे दबाव आणून धर्मांतर आणि लैंगिक शोषण करणे हे फारच धक्कादायक आहे. पोलिसांनी अतिशय वेगाने कारवाई करून या प्रकरणाचा पर्दाफाश केला आहे. यामागे कोणते संघटित रॅकेट आहे का, याचा मुळापर्यंत जाऊन तपास केला जाईल. दोषींना कोणत्याही परिस्थितीत सोडले जाणार नाही."
तपासाची चक्रे फिरली...
आतापर्यंत या प्रकरणी एकूण ९ गुन्हे दाखल करण्यात आले आहेत. आरोपींचे मोबाईल रेकॉर्ड्स आणि कंपनीतील संशयास्पद हालचालींची चौकशी सुरू आहे. या घटनेमुळे नाशिकमधील औद्योगिक क्षेत्रात मोठी खळबळ उडाली असून महिलांच्या सुरक्षिततेचा प्रश्न पुन्हा ऐरणीवर आला आहे.
?s=20