मालेगाव, (प्रतिनिधी) ७ फेब्रुवारी - मालेगाव महानगरपालिकेत आज महापौर आणि उपमहापौर निवडीचा उत्साह असतानाच एक मोठी दुर्घटना घडली. महापालिकेची लिफ्ट क्षमतेपेक्षा जास्त प्रवासी भरल्याने थेट पाचव्या मजल्यावरून खाली कोसळली. या लिफ्टमध्ये नवनिर्वाचित पदाधिकारी आणि पत्रकारांसह १५ ते १६ जण अडकले होते. सुदैवाने, या भीषण अपघातात कोणतीही जीवितहानी झाली नाही, मात्र काही काळ महापालिका परिसरात भीतीचे वातावरण पसरले होते.
नेमकी घटना काय?
आज सकाळी मालेगाव महानगरपालिकेत महापौर आणि उपमहापौर पदासाठी निवडणूक प्रक्रिया पार पडली. निवडणूक निकाल जाहीर झाल्यानंतर नवनिर्वाचित पदाधिकाऱ्यांचे अभिनंदन करण्यासाठी आणि पुढील कार्यवाहीसाठी सर्वांचीच मोठी लगबग सुरू होती. सभागृहातून बाहेर पडताना लिफ्टचा वापर करण्यासाठी मोठी गर्दी झाली.
घाईघाईत एकाच वेळी १५ ते १६ जण लिफ्टमध्ये शिरले. लिफ्टची क्षमता संपलेली असतानाही गर्दी झाल्यामुळे ओव्हरलोड होऊन तांत्रिक बिघाड झाला आणि लिफ्ट पाचव्या मजल्यावरून वेगाने खाली कोसळली.
थरारक अनुभव अन् सुटका
लिफ्ट खाली कोसळताच मोठा आवाज झाला, ज्यामुळे महापालिका कर्मचाऱ्यांनी तातडीने धाव घेतली. लिफ्टमध्ये नवनिर्वाचित नगरसेवक, काही पदाधिकारी आणि वृत्तवाहिनीचे पत्रकार अडकले होते. लिफ्टमध्ये दाटीवाटी झाल्याने अनेकांना गुदमरल्यासारखे वाटू लागले होते. घटनेची माहिती मिळताच तातडीने बचाव कार्य राबवून काही वेळातच सर्वांना सुरक्षित बाहेर काढण्यात आले.
सुदैव बलवत्तर म्हणून बचावले!
"लिफ्ट अचानक खाली गेल्याने काळजाचा ठोका चुकला होता. पाचव्या मजल्यावरून लिफ्ट खाली येईपर्यंत काय होईल हे सुचत नव्हते. मात्र, देवाची कृपा की कोणालाही गंभीर दुखापत झाली नाही," अशी भावना लिफ्टमधील एका प्रवाशाने व्यक्त केली.
प्रशासकीय सुरक्षेवर प्रश्नचिन्ह
या घटनेमुळे महापालिकेतील लिफ्टच्या देखभालीचा आणि सुरक्षेचा प्रश्न पुन्हा ऐरणीवर आला आहे. क्षमतेपेक्षा जास्त लोक लिफ्टमध्ये चढत असताना त्यांना रोखण्यासाठी कोणतीही सुरक्षा यंत्रणा किंवा ऑपरेटर त्याठिकाणी उपस्थित नव्हता का? असा सवाल आता उपस्थित केला जात आहे.
