मनोहर शिंदे, (नाशिक) १४ ऑक्टोबर - नाही रे वर्गातील मुलांसाठी श्रीमंतांचा खेळ समजला जाणारा ‘गोल्फ’ हा केवळ एक स्वप्नच असू शकतो. मात्र, नाशिक जिल्ह्यातील निफाड तालुक्यात कदवा नदीच्या काठी असलेल्या एका गोल्फ कोर्सवर शेतमजूर, अल्पभूधारक शेतकरी आणि कामगारांची ५० मुले हातात गोल्फ क्लब (स्टिक्स) धरून व्यावसायिक खेळाडूंसारखे शॉट्स मारताना दिसत आहेत. माजी भारतीय हवाई दल अधिकारी विंग कमांडर प्रदीप बागमार यांच्या पुढाकारामुळे हा रंजक आणि प्रेरणादायी बदल घडून आला आहे.
२०१९ मध्ये ५ मुलांपासून सुरुवात; आज ५० बालके पटाईत
भारतीय हवाई दलातून निवृत्त झालेले विंग कमांडर प्रदीप बागमार यांनी २०१८ मध्ये पर्यटनाला चालना देण्यासाठी निफाड येथे २२ एकर जागेत ‘रिव्हरसाईड गोल्फ कोर्स’ उभारला होता. २०१९ पासून त्यांनी परिसरातील सरकारी शाळांमध्ये जाऊन विद्यार्थ्यांना या खेळाची माहिती दिली.
सुरुवातीला आव्हान: गावकऱ्यांना व पालकांना या अनोख्या खेळाबद्दल माहिती नसल्याने सुरुवातीला फक्त ५ मुले पुढे आली.
आजची स्थिती: आज या उपक्रमात तब्बल ५० मुले नियमित सराव करत आहेत. या बालकांना मोफत प्रशिक्षण, खेळाचे महागडे साहित्य आणि सरावानंतर मोफत अल्पोपहारही दिला जातो.
स्पर्धेत ग्रामीण गुणवत्तेचा डंका!
या उपक्रमाचे फळ आता दिसू लागले आहे. जून २०२६ मध्ये 'इंडियन गोल्फ युनियन' (IGU) तर्फे आयोजित ज्युनियर आणि ॲमेच्योर फीडर टूर (पश्चिम विभाग) स्पर्धेत या ग्रामीण विद्यार्थ्यांनी बाजी मारली:
प्रथम क्रमांक: अजय चव्हाण (वय १५) – शालेय व्हॅन चालकाचा मुलगा.
द्वितीय क्रमांक: इशांत सोनेवणे – कारखान्यातील कामगाराचा मुलगा.
तृतीय क्रमांक: अश्विन पवार – शेतमजुराचा मुलगा.
हे तिघेही आता पश्चिम भारतातील पुढील आयजीयू राष्ट्रीय स्पर्धांमध्ये नाशिकचे प्रतिनिधित्व करणार आहेत.
अभ्यास सांभाळून खेळ आणि इंग्रजीचे धडे
मुलांच्या अभ्यासावर परिणाम होऊ नये म्हणून सरावाची वेळ वीकेंडला (शनिवार-रविवार) ठेवण्यात आली आहे. नाशिकचे प्रशिक्षक राजू अहिरवार आणि आंतरराष्ट्रीय स्तरावरील माजी गोल्फपटू इंद्रजित भलोटिया (कोलकाता) मुलांना प्रशिक्षण देत आहेत.
प्रशिक्षणासोबतच भलोटिया हे ऑनलाइन वर्ग घेऊन या ग्रामीण मुलांना इंग्रजी भाषा, संवाद कौशल्य आणि लाइफ स्किल्स शिकवत आहेत.
भविष्यातील संकल्प: ५०० मुलांना प्रशिक्षण देण्याचे उद्दिष्ट
या उपक्रमाचा विस्तार करण्यासाठी आता पुढील वर्षात ५०० विद्यार्थ्यांना प्रशिक्षित करण्याचे उद्दिष्ट बागमार आणि भलोटिया यांनी ठेवले आहे. ग्रामीण भागातून गुणवान खेळाडू शोधण्यासाठी टॅलेंट हंट आयोजित केले जाणार असून, मुलांच्या वाहतुकीसाठी बस खरेदी करण्याच्या दृष्टीने कॉर्पोरेट कंपन्यांकडे 'सीएसआर' (CSR) निधीसाठी संपर्क साधला जात आहे.
क्रिकेट आणि फुटबॉल पलीकडे जाऊन या मुलांनी धरलेली गोल्फ स्टिक आता त्यांच्या आयुष्याला एक नवीन दिशा देत आहे.