नवी दिल्ली, (प्रतिनिधी) ५ ऑक्टोबर - देशभरात पसरलेल्या अंमली पदार्थांच्या तस्करांचे जाळे उद्ध्वस्त करण्यासाठी महसूल गुप्तचर संचालनालयाने (DRI) धडक मोहीम उघडली आहे. गुप्त माहितीच्या आधारे देशातील वेगवेगळ्या भागात केलेल्या तीन मोठ्या कारवायांमध्ये सुमारे १५ किलो ५९० ग्रॅम अमली पदार्थ जप्त करण्यात आले आहेत. यामध्ये ॲम्फेटामाइन, कोकेन आणि हेरॉईन या उच्च दर्जाच्या ड्रग्जचा समावेश आहे. याप्रकरणी एनडीपीएस (NDPS) कायद्यांतर्गत ५ जणांना अटक करण्यात आली आहे.
१. इंदूरमध्ये दीड तास पाठलाग अन् स्टेपनीत सापडले ७ किलो ॲम्फेटामाइन
पहिली घटना ३० सप्टेंबर २०२६ रोजी मध्य प्रदेशात घडली. डीआरआयने मध्य प्रदेशातील उज्जैन-देवास टोल नाक्यावर एका संशयित महिंद्रा थार गाडीला थांबवण्याचा प्रयत्न केला. मात्र, चालकाने गाडी न थांबवता भरधाव वेगाने अडथळा तोडून पळ काढला. यानंतर डीआरआय आणि केंद्रीय अमली पदार्थ विभागाच्या (CBN) अधिकाऱ्यांनी तब्बल दीड तास या गाडीचा थरारक पाठलाग केला.
अखेर इंदूरमधील बिचोली मर्दाना परिसरात गाडीला घेराव घालून अडवण्यात आले. गाडीची झडती घेतली असता मागील दरवाजावर लावलेल्या अतिरिक्त चाकात (स्टेपनी) लपवलेली २१ पाकिटे सापडली. त्यात ७ किलो ११६ ग्रॅम 'ॲम्फेटामाइन' हा स्फटिकासारखा अंमली पदार्थ आढळला. या प्रकरणी तिघांना अटक करून गाडीसह माल जप्त करण्यात आला.
२. हैदराबाद विमानतळावर 'चॉकलेट नळ्यां'मधून ५ किलो कोकेन जप्त
दुसऱ्या कारवाईत, २९ सप्टेंबर रोजी हैदराबादच्या राजीव गांधी आंतरराष्ट्रीय विमानतळावर दोहा येथून आलेल्या एका भारतीय प्रवाशाला संशयावरून रोखण्यात आले. त्याच्या बॅगची तपासणी केली असता चॉकलेटच्या ७ नळ्या सापडल्या. या नळ्यांवर लिहिलेल्या वजनापेक्षा त्या अधिक जड वाटल्याने अधिकाऱ्यांनी संशयावरून त्या उघडल्या.
नळ्यांच्या आत चॉकलेटसोबत अत्यंत कौशल्याने लपवलेल्या २०७ अंडाकृती कॅप्सूल आढळल्या. नार्कोटिक किटद्वारे तपासणी केली असता त्यात ४.९ किलो उच्च दर्जाचे 'कोकेन' असल्याचे निष्पन्न झाले. आरोपी प्रवाशाला तातडीने बेड्या ठोकण्यात आल्या.
३. पंजाबमध्ये टॅक्सी प्रवाशाच्या बॅकपॅकमध्ये साडेतीन किलो हेरॉईन
२९ सप्टेंबर रोजीच करण्यात आलेल्या तिसऱ्या कारवाईत, पंजाबमधील जालंधरजवळील फिल्लौर येथे सतलज नदीच्या पुलावर डीआरआयने कडक पाळत ठेवली होती. तपासणीदरम्यान कार-पूलिंग (सामाईक) टॅक्सीतून प्रवास करणाऱ्या एका प्रवाशावर संशय आला.
त्याच्या बॅकपॅकची (पाठीवरची पिशवी) तपासणी केली असता त्यात लपवलेली ३ मोठी आणि त्यातील ६ छोटी पाकिटे सापडली. त्यात ३.५७४ किलो 'हेरॉईन' असल्याचे स्पष्ट झाले. संबंधित प्रवाशाला एनडीपीएस कायद्यानुसार तात्काळ अटक करण्यात आली.
तस्करीचे नवीन मार्ग उघड
डीआरआयने केलेल्या या धडक कारवायांमुळे आंतरराष्ट्रीय आणि आंतरराज्यीय ड्रग्ज रॅकेटचे धाबे दणाणले आहेत. चॉकलेटच्या नळ्या, वाहनांचे सुटे भाग आणि सामायिक टॅक्सीसारख्या मार्गांचा वापर करून चाललेल्या या तस्करीचा पर्दाफाश करण्यात अधिकाऱ्यांना मोठे यश आले आहे.