मनोहर शिंदे, (नाशिक) ३ ऑक्टोबर - “दोन्ही आयुक्तांमध्ये साधं सिग्नलवरही समन्वय नाही; मग सिंहस्थ कसा सांभाळणार?” असा थेट आणि रोकडा सवाल विचारत साप्ताहिक ‘सुपरफास्ट नाशिक मेल’ने नाशिक शहरातील विस्कळीत वाहतूक व्यवस्था आणि प्रशासकीय अनास्थेवर ओढलेल्या ताशेऱ्यांची अखेर महापालिका व पोलीस प्रशासनाने गंभीर दखल घेतली आहे. ‘सुपरफास्ट नाशिक मेल’च्या या परखड अग्रलेखानंतर खडबडून जागे झालेल्या प्रशासनाने शहरातील वाहतूक व्यवस्थेत सुधारणा करण्यासाठी मोठा निर्णय घेतला असून, नाशिक शहरातील सर्व ७० ट्रॅफिक सिग्नल्सचे नियंत्रण आता ‘स्मार्ट सिटी कॉर्पोरेशन’कडे सोपवण्याचा मार्ग मोकळा झाला आहे.
२०२७ च्या सिंहस्थ कुंभमेळ्याच्या पार्श्वभूमीवर शहरात लाखोंची गर्दी होणार असताना, वाहतूक सिग्नल्सच्या नियोजनातील सावळागोंधळ 'सुपरफास्ट नाशिक मेल'ने चव्हाट्यावर आणला होता. या बातमीच्या दणक्यामुळेच प्रशासकीय पातळीवर चक्रे वेगाने फिरली आणि सर्व सिग्नल्स एकाच यंत्रणेच्या अखत्यारीत आणण्याच्या प्रक्रियेला गती मिळाली.
‘सुपरफास्ट नाशिक मेल’च्या वृत्ताचा नेमका प्रभाव काय?
सध्या नाशिक शहरात सिग्नल्सच्या व्यवस्थापनात दोन तुकडे पडले होते. स्मार्ट सिटी मिशनअंतर्गत उभारलेले ४० हायटेक सिग्नल ‘नाशिक म्युनिसिपल स्मार्ट सिटी डेव्हलपमेंट कॉर्पोरेशन’ (NMSCDCL) चालवत होते, तर उर्वरित ३० जुने सिग्नल नाशिक महानगरपालिकेकडे होते. दोन वेगवेगळ्या विभागांमुळे सिग्नल बंद पडल्यास दुरुस्तीवरून एकमेकांकडे बोट दाखवले जात असे. 'सुपरफास्ट नाशिक मेल'ने या समन्वयाच्या अभावावर बोट ठेवताच, पोलीस आयुक्त संदीप कर्णिक यांनी पुढाकार घेत सर्व सिग्नल्स एकाच छताखाली आणण्याची ठाम सूचना महापालिकेला केली.
आता बदल काय होणार?
१. जुन्या ३० सिग्नल्सचे अपग्रेडेशन: महानगरपालिकेच्या अखत्यारीत असलेले ३० जुने सिग्नल आता आधुनिक तंत्रज्ञानाने सुसज्ज केले जातील.
२. सेंट्रलाइज्ड कमांड अँड कंट्रोल: सर्व ७० सिग्नल्स स्मार्ट सिटीच्या एकाच 'कमांड सेंटर'वरून नियंत्रित केले जातील.
३. तातडीने तक्रार निवारण: सिग्नल बिघाडाच्या वेळी पोलिसांना वेगवेगळ्या विभागांकडे धाव घ्यावी लागणार नाही; एकाच यंत्रणेमुळे प्रश्न तातडीने सुटतील.
स्मार्ट सिटी कॉर्पोरेशनचे मुख्य कार्यकारी अधिकारी (CEO) सुमंत मोरे यांनी दिलेल्या माहितीनुसार, मार्च २०२७ पर्यंत ही संपूर्ण अपग्रेडेशनची आणि हस्तांतरणाची प्रक्रिया पूर्ण केली जाणार आहे.
‘सुपरफास्ट नाशिक मेल’ने जनतेच्या आणि शहराच्या हिताचा प्रश्न सातत्याने लावून धरल्यामुळेच कुंभमेळ्यापूर्वी नाशिकची ट्रॅफिक सिस्टीम 'हायटेक' होण्याचा मार्ग सुकर झाला असून, या निर्णयाचे नाशिककरांकडून जोरदार स्वागत होत आहे.