नवी दिल्ली, (प्रतिनिधी) २४ सप्टेंबर - चीनमधील शांघाय येथे ४८ व्या 'जागतिक कौशल्य स्पर्धेला' (WorldSkills Competition 2026) भव्य सोहळ्यात अधिकृतपणे सुरुवात झाली आहे. या जागतिक महाकुंभामध्‍ये भारताने आतापर्यंतचे आपले सर्वात मोठे ७० युवा स्पर्धकांचे पथक उतरवले आहे. शांघाय वर्ल्ड एक्स्पो कल्चरल सेंटर येथे पार पडलेल्या रंगतदार उद्घाटन सोहळ्यात तिरंगा ध्वज हाती घेऊन भारतीय पथकाने 'परेड ऑफ नेशन्स'मध्ये दिमाखात हजेरी लावली.
ही स्पर्धा २४ ते २६ सप्टेंबरदरम्यान शांघाय येथील राष्ट्रीय प्रदर्शन आणि संमेलन केंद्रात रंगणार असून २७ सप्टेंबर रोजी समारोप सोहळा पार पडेल.
भारताच्या सहभागाची प्रमुख वैशिष्ट्ये:
६३ कौशल्य प्रकारांत आव्हान: भारतीय संघ तब्बल ६३ वेगवेगळ्या कौशल्य प्रकारांमध्ये (Skill Categories) आपले कसब पणाला लावणार आहे.
११ नवीन क्षेत्रांत प्रथमच सहभाग: यावर्षी भारत प्रथमच ११ नवीन कौशल्य प्रकारांमध्ये आंतरराष्ट्रीय स्तरावर उतरत आहे.
'ITI' च्या विद्यार्थ्यांची भरारी: ७० भारतीय स्पर्धकांमधील १४ युवा हे औद्योगिक प्रशिक्षण संस्थांमधील (ITI) विद्यार्थी आहेत, ही देशातील कौशल्य परिसंस्थेसाठी अभिमानास्पद बाब आहे.
६५ हून अधिक देश आमनेसामने: या स्पर्धेत ६५ हून अधिक देशांमधील सुमारे १,४०० गुणवंत युवा स्पर्धक सहभागी झाले आहेत.
कठोर प्रशिक्षण आणि जागतिक मानके
'वर्ल्डस्किल्स इंटरनॅशनल'तर्फे दर दोन वर्षांनी आयोजित केली जाणारी ही स्पर्धा व्यावसायिक शिक्षण आणि तांत्रिक कौशल्याची जगातील सर्वात मोठी स्पर्धा मानली जाते. एमएसडीई (MSDE) आणि राष्ट्रीय कौशल्य संघटनेच्या (NSO) मार्गदर्शनाखाली, अनेक महिन्यांचा कसून सराव आणि उद्योग क्षेत्रातील तज्ज्ञांचे मार्गदर्शन घेतल्यानंतर भारतीय संघ शांघायमध्ये दाखल झाला आहे.
"आपल्या तरुणांना जगातील सर्वोत्कृष्ट स्पर्धकांसोबत स्वतःच्या क्षमतांची तुलना करण्याची आणि भारताची तांत्रिक प्रगती दाखवून देण्याची ही सुवर्णसंधी आहे," असा विश्वास एमएसडीईच्या वरिष्ठ आर्थिक सल्लागार मनीषा सेन शर्मा आणि एनएसओचे महासंचालक दिलीप कुमार यांनी व्यक्त केला.