धुळे/अहिल्यानगर, (प्रतिनिधी) ८ सप्टेंबर - लाचलुचपत प्रतिबंधक विभागाने (ACB) मंगळवारी नाशिक परिक्षेत्रात दोन स्वतंत्र व धडक कारवाया करत भ्रष्ट महसूल कर्मचाऱ्यांचे धाबे दणाणले आहेत. धुळ्यात अवैध गौण वाहतुकीच्या कारवाईची भीती दाखवून १२ हजार रुपयांची लाच घेणाऱ्या तलाठ्यासह त्याच्या खाजगी हस्तकाला रंगेहात पकडण्यात आले, तर दुसऱ्या कारवाईत अहिल्यानगर येथे संगणकीय सातबाऱ्यावर नोंद घेण्यासाठी लाच मागणारी महिला मंडळ अधिकारी एसीबीच्या जाळ्यात अडकली आहे. या दोन्ही कारवायांमुळे महसूल वर्तुळात प्रचंड खळबळ उडाली आहे.
कारवाई १: धुळ्यात वाहनावर गुन्हा दाखल न करण्यासाठी १२ हजारांची लाच; तलाठी व खाजगी इसम ताब्यात
नेमके प्रकरण:
धुळे येथील एका २६ वर्षीय तक्रारदाराचा बांधकाम साहित्य वाहतुकीचा व्यवसाय आहे. त्यांचे मालकीचे हायवा वाहन साकी रोडवरील मोती नाल्याजवळ थांबलेले असताना मोहाडीचे तलाठी दिनेश दिलवर दाभाडे, बाळापूरचे तलाठी मृणाल शरद नगराळे आणि तलाठी गायकवाड यांनी चालकाकडून तक्रारदाराचा मोबाईल क्रमांक घेतला व त्यांना चाळीसगाव चौफुलीवर बोलावले. तिथे त्यांनी तक्रारदाराला "तुला हायवाने वाहतूक करायची असल्यास २० हजार रुपये द्यावे लागतील, अन्यथा अवैध गौण वाहतुकीचा गुन्हा दाखल करू," अशी धमकी दिली. तक्रारदाराने घाबरून तत्काळ ८ हजार रुपये दाभाडे यांना दिले. मात्र, उर्वरित १२ हजार रुपये त्वरित आणून देण्याचा तगादा लावल्याने तक्रारदाराने धुळे एसीबीकडे तक्रार केली.
सापळा व कारवाई:
एसीबीने ७ सप्टेंबर रोजी तक्रारीची पडताळणी केली असता, तलाठी दाभाडे याने खाजगी इसम जयेश कैलास चौधरी (वय ३१) याला भेटण्यास सांगितले. चौधरीने तलाठी दाभाडे यांच्यासाठी १२ हजार रुपयांची लाच मागितल्याचे निष्पन्न झाले.
त्यानुसार ८ सप्टेंबर रोजी एसीबीने रचलेल्या सापळ्यात जयेश चौधरी याने तक्रारदाराकडून १२ हजारांची लाच स्वीकारली आणि तलाठी नगराळे याच्याशी फोनवर बोलणे करून दिले. त्यानंतर चौधरीने ही रक्कम तलाठी दाभाडे याच्या स्वाधीन करताच दबा धरून बसलेल्या पथकाने दोघांना रंगेहात पकडले. या कारवाईदरम्यान बाळापूरचा तलाठी मृणाल नगराळे मात्र फरार झाला. याप्रकरणी धुळे शहर पोलीस ठाण्यात भ्र.प्र.का. कलम ७ व ७(अ) नुसार गुन्हा दाखल करण्याची प्रक्रिया सुरू आहे.
कारवाई २: अहिल्यानगरमध्ये ऑनलाईन सातबारा नोंदीसाठी लाच मागणारी महिला मंडळ अधिकारी जेरबंद
नेमके प्रकरण:
अहिल्यानगर येथील ५८ वर्षीय तक्रारदार व त्यांच्या मित्राने मौजे बुऱ्हाणनगर येथील गट क्र. ६, प्लॉट क्र. ४९ मधील २१०.९० चौ.मी. क्षेत्र खरेदी केले होते. या व्यवहाराची नोंद जुन्या सातबारा उताऱ्यावर फेरफार क्र. ६८०२ अन्वये झाली होती, मात्र संगणकीय सातबारा तयार करताना ती नोंद ऑनलाईन दिसत नव्हती. सदर नोंद ऑनलाईन करण्यासाठी तक्रारदाराने ८ डिसेंबर २०२५ रोजी तहसीलदारांकडे अर्ज केला होता. या अर्जाची चौकशी कापूरवाडी येथील मंडळ अधिकारी श्रीमती संगीता नारायण पुंड (वय ३७, रा. ई.एम.ई कॉलनी, अहिल्यानगर) यांच्याकडे होती.
लाचेची मागणी व अटक:
सदर कामासाठी संगीता पुंड यांनी तक्रारदाराकडे ५ हजार रुपयांच्या लाचेची मागणी करून १ हजार रुपये आधीच स्वीकारले होते व उर्वरित ४ हजार रुपयांसाठी पाठपुरावा सुरू ठेवला होता. एसीबीने २७ जुलै रोजी केलेल्या पडताळणीत पुंड यांनी उर्वरित ४ हजार रुपयांची मागणी केल्याचे सिद्ध झाले. तसेच तक्रारदाराने तहसील कार्यालयातील अन्य एका महिला अधिकाऱ्याच्या पैशांबाबत विचारले असता "तिच्या संग बोलू आपण", असे म्हणून त्यांनाही लाच देण्यास प्रोत्साहन दिल्याचे स्पष्ट झाले.
त्यानुसार मंगळवारी, ८ सप्टेंबर रोजी भिंगार कॅम्प पोलीस ठाण्यात गुन्हा रजि. क्र. ४६२/२०२६ (कलम ७ व १२) दाखल करून सायंकाळी १७:०८ वाजता संगीता पुंड यांना अटक करण्यात आली.
वरिष्ठांचे मार्गदर्शन व पथक
या दोन्ही धडक कारवाया लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक प्रदीप मैराळे व कविता फडतरे यांच्या मार्गदर्शनाखाली पार पडल्या:
धुळे पथक: पोलीस उपअधीक्षक सचिन साळुंखे यांच्या पर्यवेक्षणात पोलीस निरीक्षक यशवंत बोरसे, पद्मावती कलाल व अंमलदार राजन कदम, मुकेश अहिरे, प्रवीण मोरे, मकरंद पाटील, प्रवीण पाटील, सुधीर मोरे.
अहिल्यानगर पथक: पोलीस उपअधीक्षक अजित त्रिपुटे यांच्या पर्यवेक्षणात पोलीस निरीक्षक छाया देवरे व अंमलदार गजानन गायकवाड, सचिन सुद्रुक, पोकॉ सुपेकर.