मुंबई, (प्रतिनिधी) २३ ऑगस्ट - गणेशोत्सवाच्या आनंदी आणि उत्साही वातावरणात मुंबईतील भुलेश्वर परिसरात एक अत्यंत दुर्दैवी दुर्घटना घडली आहे. 'भुलेश्वरचा राजा' म्हणून प्रसिद्ध असलेली तब्बल २२ फूट उंच गणेशमूर्ती आगमन सोहळ्यादरम्यान भायखळ्याहून भुलेश्वरकडे नेत असताना अचानक एका बाजूला कलंडून कोसळली. या भीषण अपघातात दोन भाविकांचा दुर्दैवी मृत्यू झाला असून दोन लहान मुलींसह पाच जण जखमी झाले आहेत.
मिरवणुकीत अचानक घडला अनर्थ
मिळालेल्या माहितीनुसार, रात्री १० वाजेच्या सुमारास बलराम मर्चंट रोडवरील कबूतरखान्याजवळील जय अंबे चौकात ही घटना घडली. ढोल-ताशांच्या गजरात मोठ्या उत्साहात भुलेश्वरच्या राजाचा आगमन सोहळा सुरू होता. मात्र, अचानक मूर्तीचा तोल गेला आणि ती रस्त्यावरील भाविकांच्या अंगावर कोसळली. मूर्ती खाली आल्याने तिथे उपस्थित असलेल्या नागरिकांना जोरदार धडक बसली आणि एकच खळबळ उडाली.
दोन तरुणांचा मृत्यू; पाच जण रुग्णालयात
घटनेनंतर स्थानिक नागरिक, मुंबई अग्निशमन दल, पोलीस, वाहतूक पोलीस आणि महापालिका कर्मचाऱ्यांनी तातडीने बचावकार्य सुरू केले. जखमींना त्वरित रुग्णालयात दाखल करण्यात आले.
महापालिका अधिकाऱ्यांनी दिलेल्या माहितीनुसार, संकेत नेवशे (३३) आणि बृजेश हेमंत जोशी (३०) या दोघांना रुग्णालयात पोहचवले असता डॉक्टरांनी त्यांना मृत घोषित केले. या दुर्घटनेत जखमी झालेल्या ५ जणांवर सध्या उपचाराची प्रक्रिया सुरू असून त्यात ५ आणि ७ वर्षांच्या दोन चिमुकल्या मुलींचाही समावेश आहे.
गणेशोत्सवाच्या तोंडावरच भुलेश्वरमधील या हृदयद्रावक दुर्घटनेमुळे संपूर्ण परिसरात आणि गणेशभक्तांमध्ये तीव्र शोककळा पसरली आहे.