ठाणे, (प्रतिनिधी) १६ ऑगस्ट - ठाण्यातील चितळसर-मानपाडा येथील म्हाडाच्या गृहप्रकल्पातील घरांच्या वाढीव दराबाबत तक्रार करणाऱ्या नागरिकांना राज्य सरकारने मोठा दिलासा दिला आहे. या गृहप्रकल्पातील घरांच्या किमती २०२०-२१ च्या रेडी रेकनर दरानुसार कमी करण्याचे स्पष्ट निर्देश उपमुख्यमंत्री एकनाथ शिंदे यांनी म्हाडा प्रशासनाला दिले आहेत. तसेच, यापूर्वी झालेल्या सोडतीतील ४३४ विजेत्या लाभार्थ्यांचे हक्क कायम ठेवत, उर्वरित सदनिकांसाठी नवीन दरांनुसार नव्याने सोडत (लॉटरी) काढण्याचे आदेशही या बैठकीत देण्यात आले.
नेमका काय होता वाद?
चितळसर-मानपाडा येथे म्हाडाने विकसित केलेल्या ११७३ घरांपैकी ९३८ घरांची सोडत १४ जुलै २०२५ रोजी काढण्यात आली होती.
या इमारतींना २०२०-२१ मध्ये अंशतः भोगवटा प्रमाणपत्र (Part OC) मिळाले होते, तेव्हा घरांचे दर प्रति चौरस फूट १० हजार रुपये, म्हणजेच साधारण ४४ लाख रुपये निश्चित करण्यात आले होते.
मात्र, २०२५-२६ मध्ये पूर्ण भोगवटा प्रमाणपत्र (Full OC) मिळाल्यानंतर म्हाडाने उर्वरित घरांचे दर २०२५-२६ च्या नवीन रेडी रेकनरनुसार थेट ५१ ते ५२ लाखांपर्यंत वाढवले.
एकाच इमारतीत राहणाऱ्या दोन वेगवेगळ्या सदनिकाधारकांकडून सारख्याच आकाराच्या घरांसाठी वेगवेगळे दर आकारले जात असल्याने नागरिकांमध्ये प्रचंड असंतोष निर्माण झाला होता. या विरोधात नागरिकांनी म्हाडाकडे तक्रारी दाखल केल्या होत्या.
दूरदृश्यप्रणालीद्वारे (Video Conferencing) महत्त्वाची बैठक
या तक्रारींची दखल घेत उपमुख्यमंत्र्यांच्या उपस्थितीत दूरदृश्यप्रणालीद्वारे विशेष बैठक आयोजित करण्यात आली होती. या बैठकीस म्हाडाचे व्यवस्थापकीय संचालक संजीव जयस्वाल, कोकण म्हाडाचे मुख्य कार्यकारी अधिकारी विशाल राठोड, म्हाडाचे वरिष्ठ अधिकारी आणि तक्रारदार नागरिकांचे प्रतिनिधी उपस्थित होते.
उपमुख्यमंत्र्यांचे मुख्य आदेश व निर्णय:
१. सरसकट २०२०-२१ चे दर लागू: एकाच इमारतीमधील सारख्याच क्षेत्रफळाच्या घरांचे वेगवेगळे दर न आकारता सर्व घरांना सरसकट २०२०-२१ चे रेडी रेकनर दर ग्राह्य धरून किमती निश्चित कराव्यात.
२. ४३४ लाभार्थ्यांना दिलासा: ज्या ४३४ विजेत्या लाभार्थ्यांनी आपली स्वीकृती पत्रे (Acceptance Letters) म्हाडाकडे जमा केली आहेत, त्यांना या निर्णयाचा थेट फायदा देऊन त्यांचे विजेतेपद कायम ठेवावे.
३. उर्वरित घरांची नव्याने सोडत: शिल्लक राहिलेल्या सदनिकांसाठी सुधारित कमी दरांनुसार (नवीन नियमांनुसार) नव्याने लॉटरी काढण्यात यावी.
ठाणेकरांची लाखो रुपयांची बचत!
उपमुख्यमंत्री एकनाथ शिंदे यांच्या या निर्णयामुळे आता चितळसर-मानपाडा येथील म्हाडाची घरे नागरिकांना ४४ ते ४६ लाख रुपयांच्या दरम्यान उपलब्ध होणार आहेत. यामुळे विजेत्या लाभार्थ्यांची तब्बल ६ ते ७ लाख रुपयांची बचत होणार असून नागरिकांमधून या निर्णयाचे स्वागत केले जात आहे.