पुणे, (प्रतिनिधी) १५ ऑगस्ट - पुणे-नाशिक महामार्गावरील अत्यंत महत्त्वाकांक्षी आणि बहुप्रतिक्षित नाशिक फाटा ते राजगुरुनगर (खेड) ८-पदरी एलिव्हेटेड कॉरिडॉरच्या कामाला आता मोठा वेग मिळणार आहे. या प्रकल्पाची निविदा प्रक्रिया येत्या १५ दिवसांत मार्गी लावली जाईल, अशी महत्त्वपूर्ण माहिती शिरूर लोकसभेचे खासदार डॉ. अमोल कोल्हे यांनी दिली आहे.
खासदार डॉ. अमोल कोल्हे यांनी दिल्लीत केंद्रीय रस्ते वाहतूक व महामार्ग मंत्री नितीन गडकरी यांची भेट घेऊन या प्रकल्पाबाबत सविस्तर चर्चा केली. यावेळी नितीन गडकरी यांनी संबंधित अधिकाऱ्यांना निविदा प्रक्रिया तातडीने पूर्ण करून प्रत्यक्ष कामाला सुरुवात करण्याचे निर्देश दिले आहेत.
प्रकल्पाचे मुख्य अपडेट्स व महत्त्वाचे मुद्दे:
भूसंपादनाचा मार्ग मोकळा:
या एलिव्हेटेड कॉरिडॉरसाठी १००% भूसंपादन असणे आवश्यक होते. प्रकल्पासाठी लागणाऱ्या १० हेक्टर जमिनीपैकी PMRDA क्षेत्रातील ६.९१ हेक्टर जमिनीसाठी निधी उपलब्ध झाला आहे, तर पिंपरी-चिंचवड महापालिका (PCMC) क्षेत्रातील ३.८१ हेक्टर जमिनीसाठी पुढील १५ दिवसांत निधी वर्ग केला जाईल.
केंद्रीय मंत्र्यांचे जिल्हाधिकाऱ्यांना आदेश:
गडकरी यांनी बैठकीदरम्यानच पुणे जिल्हाधिकाऱ्यांशी दूरध्वनीवरून संवाद साधून भूसंपादन प्रक्रियेचा आढावा घेतला आणि या कामाला गती देण्याच्या सूचना दिल्या.
इतर मागण्यांना मंजुरीची शक्यता:
मंचर आणि कळंब बायपास परिसरातील अपघातप्रवण ठिकाणी तातडीने भुयारी मार्ग (Underpass) आणि सर्व्हिस रोड उभारण्याची मागणीही डॉ. कोल्हे यांनी केली.
एमआयडीसी रस्त्यांची डागडुजी:
तळेगाव-चाकण-शिक्रापूर, हडपसर-यवत आणि पुणे-शिरूर या मार्गांवरील खड्ड्यांची अडचण लक्षात घेता, गडकरी यांनी एमआयडीसीचे व्यवस्थापकीय संचालक (MD) यांना रस्त्यांच्या दुरुस्तीची कामे प्राधान्याने पूर्ण करण्याचे निर्देश दिले आहेत.