नवी दिल्ली, (प्रतिनिधी) २६ जुलै - लष्करी आणि क्षेत्रीय रुग्णालयांमध्ये (Military and Field Hospitals) आयुष बाह्यरुग्ण विभाग (OPD) सुरू करून आयुष-आधारित उपचार सेवा उपलब्ध करून देण्यात याव्यात, असा महत्त्वपूर्ण प्रस्ताव केंद्रीय आयुष राज्यमंत्री (स्वतंत्र प्रभार) आणि आरोग्य व कुटुंब कल्याण राज्यमंत्री प्रतापराव जाधव यांनी मांडला आहे. यासंदर्भात त्यांनी देशाचे संरक्षणमंत्री राजनाथ सिंह यांना अधिकृत पत्र लिहून या उपक्रमासाठी पुढाकार घेण्याची विनंती केली आहे.
पारंपरिक वैद्यक पद्धतींची जोड देण्याची गरज
सशस्त्र दलाची वैद्यकीय सेवा देशाच्या सैनिकांना अत्यंत बिकट आणि आव्हानात्मक परिस्थितीत दर्जेदार आरोग्यसेवा पुरवत असते. सैनिकांकडे सक्षम आधुनिक वैद्यकीय पायाभूत सुविधा उपलब्ध आहेतच; परंतु त्याला भारताच्या पारंपरिक वैद्यक पद्धतींची (आयुर्वेद, योग, युनानी, सिद्ध, होमिओपॅथी) जोड दिल्यास सैनिकांचे आरोग्य संवर्धन, प्रतिबंधात्मक काळजी आणि सर्वांगीण आरोग्यसेवा अधिक मजबूत होईल, असा विश्वास प्रतापराव जाधव यांनी या पत्रात व्यक्त केला आहे.
प्रस्तावातील प्रमुख मुद्दे:
मर्यादित सुविधांचा विस्तार: सध्या संरक्षण मंत्रालयांतर्गत केवळ मोजक्याच संस्थांमध्ये आयुष सुविधा आहेत. अनेक लष्करी आणि क्षेत्रीय रुग्णालयांमध्ये अद्याप स्वतंत्र आयुष विभाग नाहीत, तिथे याचा विस्तार आवश्यक आहे.
विशेष क्षेत्रांवर भर: या विस्तारामुळे जवानांना जीवनशैली व्यवस्थापन (Lifestyle Management), पुनर्वसन (Rehabilitation), प्रतिबंधात्मक आरोग्य काळजी आणि मानसिक-शारीरिक स्वास्थ्यासाठी मोठा लाभ होईल.
पूरक आरोग्य प्रारूप: आयुष सेवांचा समावेश आधुनिक वैद्यकीय व्यवस्थेला पूरक ठरेल आणि सैनिकांसाठी अधिक व्यापक तसेच रुग्ण-केंद्रित आरोग्य प्रारूप (Patient-centric model) तयार होईल.
आयुष मंत्रालय पूर्ण सहकार्यासाठी तयार
"सर्व लष्करी व क्षेत्रीय रुग्णालयांत आयुष सेवा सुरू करण्यासाठी आवश्यक असणारे सर्व तांत्रिक सहाय्य, व्यावसायिक मार्गदर्शन आणि संस्थात्मक सहकार्यासाठी (MoU) आयुष मंत्रालय पूर्णपणे कटिबद्ध आहे. हा उपक्रम देशाचा समृद्ध पारंपरिक वैद्यकीय वारसा सार्वजनिक व लष्करी आरोग्य व्यवस्थेशी जोडणारा ठरेल," असे प्रतिपादन केंद्रीय मंत्री प्रतापराव जाधव यांनी केले आहे.