नवी दिल्ली, (प्रतिनिधी) २३ जुलै - जंतरमंतरवर गेल्या महिन्याभरापासून सुरू असलेले ‘जेन-झी’ (Gen-Z) तरुणांचे आंदोलन गुरुवारी अचानक अत्यंत हिंसक वळणावर आले. संसद मार्गावर जमलेल्या आंदोलकांना पांगवण्यासाठी पोलिसांनी पुन्हा एकदा जोरदार लाठीहल्ला केला आणि अश्रुधुराच्या नळकांड्या फोडल्या. या झटापटीत आणि दगडफेकीत ५ पोलीस जखमी झाले असून, परिस्थिती हाताबाहेर गेल्यामुळे खबरदारीचा उपाय म्हणून जंतरमंतर परिसरातील इंटरनेट सेवा तात्पुरती बंद करण्यात आली आहे.
या सर्व घडामोडींनंतर कॉक्रोच जनता पक्षाचे (CJP) अभिजीत दीपके आणि मुख्य प्रवक्ते सौरभ दास यांनी तीव्र संताप व्यक्त करत सरकारवर विद्यार्थ्यांना चिरडण्यासाठी कटकारस्थान रचल्याचा थेट आरोप केला आहे.
सर्वोच्च न्यायालयाचा तातडीच्या सुनावणीस नकार
पोलिसांच्या दडपशाहीविरोधात वकिलांनी सर्वोच्च न्यायालयात धाव घेत तातडीने सुनावणीची विनंती केली होती. वकिलांनी घटनेचा व्हिडीओ दाखवण्याचा प्रयत्न केला असता, सरन्यायाधीश सूर्य कांत यांनी तो पाहण्यास नकार दिला. "व्हिडीओ बघण्यात आम्हाला रस नाही, उगाच आमचा आणि तुमचा वेळ वाया घालवू नका," असे म्हणत सर्वोच्च न्यायालयाने याप्रकरणी हस्तक्षेप करण्यास व तातडीने सुनावणी घेण्यास स्पष्ट नकार दिला.
सरकार संसदेत NEET वर चर्चेला तयार; विरोधक राजीनाम्यावर ठाम
केंद्रीय मंत्री जे.पी. नड्डा यांनी पत्रकार परिषद घेऊन काँग्रेसवर आंदोलनाचे राजकारण करत असल्याचा आरोप केला. NEET संदर्भात सरकार संसदेत कोणत्याही वेळी सविस्तर चर्चेसाठी तयार असल्याचे त्यांनी स्पष्ट केले. दरम्यान, संसदीय कामकाज मंत्री किरेन रिजीजू यांनीही चर्चेची तयारी दर्शवली आहे. या पार्श्वभूमीवर शिक्षण मंत्री धर्मेंद्र प्रधान यांनी लोकसभा अध्यक्ष ओम बिर्ला यांची भेट घेतली. मात्र, विरोधक आणि आंदोलक धर्मेंद्र प्रधान यांच्या राजीनाम्याच्या मागणीवर ठाम आहेत.
शांततेचे आवाहन अन् आंदोलकांचा इशारा:
सौरभ दास (CJP मुख्य प्रवक्ते): "धर्मेंद्र प्रधान यांचा राजीनामा हा वाटाघाटीचा विषय नाही. जे.पी. नड्डा यांना लाज वाटली पाहिजे. सरकार आंदोलनात समाजकंटक घुसवून ते भरकटवण्याचा प्रयत्न करत आहे. सोनम वांगचुक यांच्याशी चर्चा झाली असून, आंदोलकांनी पूर्णपणे शांतता बाळगावी. गरज पडल्यास हे आंदोलन सहा महिने चालवू!"
अभिजीत दीपके (CJP): "विद्यार्थ्यांचे शांततापूर्ण आंदोलन चिरडण्याचा हा सरकारचा कुटील डाव आहे. पण आमचा मार्ग अहिंसेचाच राहील."
