नाशिक, (प्रतिनिधी) १५ जुलै - शहरातील औद्योगिक वसाहत असलेल्या श्रमिकनगर भागात एका रिक्षाचालकाची रिक्षा पेट्रोल टाकून पेटवून दिल्याची धक्कादायक घटना घडली आहे. अज्ञात दोन समाजकंटकांनी रिक्षाची काच फोडून आणि हुड फाडून हा प्रकार केला. परिसरातील नागरिकांनी वेळीच धाव घेतल्याने मोठी दुर्घटना टळली असली, तरी रिक्षाचे मोठे नुकसान झाले आहे. हा संपूर्ण प्रकार परिसरातील सीसीटीव्ही कॅमेऱ्यात कैद झाला असून, याप्रकरणी सातपूर पोलीस ठाण्यात गुन्हा दाखल करण्यात आला आहे.
मध्यरात्रीची गुंडगिरी
मिळालेल्या माहितीनुसार, श्रमिकनगरमधील स्वामी समर्थ केंद्राजवळ राहणारे गौरव चंद्रकांत बोरसे हे रिक्षा चालवून आपला उदरनिर्वाह करतात. सोमवारी (दि. १३) रात्री त्यांनी आपली 'MH 15 FU 5832' क्रमांकाची ऑटोमॅटिक रिक्षा नेहमीप्रमाणे घरासमोर पार्क केली होती.
दरम्यान, पहाटेच्या सुमारास दोन अज्ञात समाजकंटक तिथे आले. त्यांनी आधी रिक्षाची पुढील काच फोडली आणि कोयत्याने रिक्षाचे हुड (कव्हर) फाडले. एवढ्यावरच न थांबता या भामट्यांनी रिक्षावर पेट्रोल ओतून ती पेटवून दिली आणि तिथून पळ काढला.
नागरिकांच्या सतर्कतेने अनर्थ टळला
रिक्षाने पेट घेताच आगीच्या ज्वाला भडकल्या. सुदैवाने, परिसरातील नागरिकांच्या हा प्रकार वेळीच निदर्शनास आला. त्यांनी तातडीने धाव घेत आग विझवण्यासाठी शर्थीचे प्रयत्न केले. नागरिकांच्या या सतर्कतेमुळे आग आटोक्यात आली आणि आजूबाजूच्या घरांना किंवा वाहनांना तिची झळ बसली नाही, ज्यामुळे एक मोठा अनर्थ टळला. मात्र, या आगीत रिक्षाचे प्रचंड नुकसान झाले आहे.
सीसीटीव्ही फुटेजच्या आधारे शोध सुरू
याप्रकरणी पीडित रिक्षाचालक गौरव बोरसे यांनी सातपूर पोलीस ठाण्यात फिर्याद दिली आहे. ही संपूर्ण घटना परिसरातील सीसीटीव्ही कॅमेऱ्यात कैद झाली असून, पोलीस या फुटेजच्या आधारे दोन्ही आरोपींचा कसून शोध घेत आहेत. या प्रकरणाचा पुढील तपास पोलीस जमादार अनिल आहेर करत आहेत.
