नाशिक, (प्रतिनिधी) १० जुलै - घोटी-सिन्नर महामार्गावरील खापराळे फाटा परिसरात एका भरधाव मालवाहू पिकअप वाहनाने जोरदार धडक दिल्याने ४४ वर्षीय पादचाऱ्याचा दुर्दैवी मृत्यू झाला. हा अपघात लग्नसोहळा आटोपून परतीच्या प्रवासाला निघताना रस्ता ओलांडत असताना घडला. अपघातानंतर संशयित चालक आपले वाहन घटनास्थळीच सोडून पसार झाला असून, याप्रकरणी सिन्नर पोलीस ठाण्यात गुन्हा दाखल करण्यात आला आहे.
विवाह सोहळ्यानंतर रस्ता ओलांडताना अपघात
पोपट बन्सी बेनके (वय ४४, रा. समशेरपूर, ता. अकोले, जि. अहिल्यानगर) असे या अपघातात ठार झालेल्या पादचाऱ्याचे नाव आहे. बेनके हे गेल्या शुक्रवारी (दि. ३) एका लग्नकार्यासाठी खापराळे फाटा भागातील जयभवानी मंगल कार्यालयात आले होते. रात्री दहा वाजेच्या सुमारास विवाह सोहळा आटोपल्यानंतर ते आपल्या नातेवाईकांसह परतीच्या प्रवासासाठी निघाले. मंगल कार्यालयासमोरून रस्ता ओलांडत असतानाच हा भीषण अपघात झाला.
गंभीर जखमी पादचाऱ्याचा उपचारादरम्यान मृत्यू
ते रस्ता ओलांडत असताना घोटीकडून सिन्नरच्या दिशेने अतिवेगाने जाणाऱ्या एका मालवाहू पिकअप वाहनाने (क्रमांक: MH 15 FV 4810) पोपट बेनके यांना जोरदार धडक दिली. या धडकेत ते गंभीर जखमी झाले. त्यांना तातडीने उपचारासाठी रुग्णालयात दाखल करण्यात आले होते, मात्र उपचारादरम्यान त्यांची प्राणज्योत मालवली. अपघाताची तीव्रता पाहून चालक त्याचे वाहन घटनास्थळीच टाकून पसार झाला.
पोलिसांत गुन्हा दाखल
याप्रकरणी मृत पोपट बेनके यांचे चुलत भाऊ नवनाथ बेनके यांनी सिन्नर पोलीस ठाण्यात फिर्याद दिली आहे. त्यांच्या फिर्यादीवरून पिकअप चालकाविरुद्ध गुन्हा दाखल करण्यात आला असून, पोलीस हवालदार खरात पुढील तपास करत आहेत. फरार चालकाचा शोध पोलीस घेत आहेत.
