नवी दिल्ली, (प्रतिनिधी) २ जुलै - देशातील विमानचालन (एव्हिएशन) क्षेत्राला अधिक आधुनिक आणि हायटेक बनवण्याच्या दृष्टीने नागरी हवाई वाहतूक मंत्रालयाने एका ऐतिहासिक टप्प्याची घोषणा केली आहे. आंध्र प्रदेशातील उंडवल्ली हेलिपोर्ट येथे हेलिकॉप्टर संचालनासाठी देशातील पहिल्या खासगी 'पॉइंट-इन-स्पेस' [PinS] इन्स्ट्रुमेंट ॲप्रोच प्रोसिजरला अधिकृत मंजुरी देण्यात आली आहे. या अत्याधुनिक प्रणालीमुळे आता खराब हवामानात किंवा दुर्गम भागातही जमिनीवरील कोणत्याही पारंपरिक यंत्रणेविना हेलिकॉप्टरचे अचूक व सुरक्षित लँडिंग करणे शक्य होणार आहे. भारतीय विमानतळ प्राधिकरणाने (AAI) विकसित केलेल्या या 'PinS' पद्धतीला नागरी हवाई वाहतूक महासंचालनालयाने (DGCA) मंजुरी दिली आहे. हे संपूर्ण तंत्रज्ञान डीजीसीएचे नियम आणि 'आंतरराष्ट्रीय नागरी विमानवाहतूक संघटनेच्या' (ICAO) जागतिक मानकांनुसार तयार करण्यात आले आहे.
काय आहे पॉइंट-इन-स्पेस (PinS) तंत्रज्ञान?
'पॉइंट-इन-स्पेस' म्हणजेच 'PinS' ही पूर्णपणे उपग्रह-आधारित (सॅटेलाइट) नॅव्हिगेशन प्रणाली आहे. सध्या विमाने किंवा हेलिकॉप्टर उतरवण्यासाठी जमिनीवर 'इन्स्ट्रुमेंट लँडिंग सिस्टीम'सारख्या महागड्या पायाभूत सुविधांची गरज असते. मात्र, हे नवीन तंत्रज्ञान थेट उपग्रहाशी जोडलेले असल्याने, अशा कोणत्याही जमिनीवरील यंत्रणेविना दुर्गम भागातील हेलिपॅड्सवरही हेलिकॉप्टर अत्यंत सुरक्षितपणे उतरू शकणार आहे. पावसाळा, धुके किंवा प्रतिकूल हवामानात ही प्रणाली मैलाचा दगड ठरणार आहे.
"हेलिकॉप्टर ऑपरेशन्सच्या क्षेत्रातील नव्या युगाची नांदी!"
या ऐतिहासिक निर्णयावर बोलताना नागरी विमानवाहतूक मंत्री राममोहन नायडू म्हणाले, "देशातील पहिल्या 'PinS' प्रणालीची सुरुवात ही हेलिकॉप्टर ऑपरेशन्सच्या क्षेत्रातील एका नव्या युगाची नांदी आहे. यामुळे उड्डाणाची सुरक्षा, कार्यक्षमता आणि कोणत्याही प्रतिकूल हवामानात संपर्क साधण्याची क्षमता लक्षणीयरीत्या वाढणार आहे." या ऐतिहासिक टप्प्यासाठी त्यांनी भारतीय विमानतळ प्राधिकरण, डीजीसीए आणि आंध्र प्रदेश सरकारचे कौतुक केले. भारतात जागतिक मानकांनुसार सर्वोत्तम ठरेल अशी हेलिकॉप्टर यंत्रणा उभारण्यासाठी सरकार कटिबद्ध असल्याचे त्यांनी सांगितले.
'गगन'नंतर दुसरा मोठा मैलाचा दगड
पंतप्रधान नरेंद्र मोदी यांच्या तंत्रज्ञान-प्रेरित नेतृत्वाखाली भारताचे विमानचालन क्षेत्र वेगाने तांत्रिक प्रगती करत असल्याचे सांगून मंत्री नायडू यांनी एका महत्त्वाच्या प्रयोगाची माहिती दिली. "गेल्याच आठवड्यात आम्ही एका व्यावसायिक विमानाद्वारे देशातील पहिल्या स्वदेशी 'गगन' (GAGAN)-आधारित अचूक लँडिंग पद्धतीचे यशस्वी प्रात्यक्षिक दाखवले होते," असे त्यांनी नमूद केले. हे पाऊल भारताच्या संपूर्ण विमानचालन व्यवस्थेला 'परफॉर्मन्स-बेस्ड नॅव्हिगेशन' (PBN) च्या माध्यमातून जागतिक सर्वोत्तम मानकांशी सुसंगत करणारे ठरेल, असा विश्वास त्यांनी व्यक्त केला.
