नाशिक, (प्रतिनिधी) १ जुलै - घरकामासाठी आणलेला केमिकलयुक्त प्लास्टिकचा ड्रम गरम चाकूने कापण्याचा प्रयत्न करणे एका महिलेच्या जीवावर बेतले आहे. ड्रममधील केमिकलचा अचानक भडका उडून गंभीर भाजलेल्या ३१ वर्षीय महिलेचा आठवडाभर मृत्यूशी झुंज दिल्यानंतर दुर्दैवी मृत्यू झाला. ही धक्कादायक घटना सिन्नर जवळील माळेगाव एमआयडीसीतील सांगळे वस्ती भागात घडली. या प्रकरणी सिन्नर एमआयडीसी पोलीस ठाण्यात आकस्मिक मृत्यूची नोंद करण्यात आली आहे. विद्या राहुल तेलोरे (वय ३१, रा. सांगळे वस्ती, माळेगाव एमआयडीसी, सिन्नर) असे मृत दुर्दैवी महिलेचे नाव आहे.
नक्की काय घडले?
पोलीस सूत्रांनी दिलेल्या माहितीनुसार, विद्या तेलोरे यांनी घरगुती वापरासाठी (पाणी किंवा इतर साहित्य भरण्यासाठी) एक प्लास्टिकचा ड्रम खरेदी केला होता. गेल्या रविवारी (१४ जून रोजी) सायंकाळच्या सुमारास त्या घरातील कामे करत होत्या. तो प्लास्टिकचा ड्रम वरून कापण्यासाठी त्यांनी घरातील चाकू धगधगत्या चुलीवर गरम केला. लालभडक झालेला तो गरम चाकू घेऊन जसा त्यांनी ड्रम कापण्यास सुरुवात केली, तसा ड्रमच्या आत असलेल्या केमिकलच्या अंशाने आणि गॅसने पेट घेतला. क्षणार्धात एका मोठ्या स्फोटासारखा भडका उडाला.
आठवडाभर मृत्यूशी झुंज अपयशी
या भीषण भडक्यात विद्या तेलोरे या गंभीररी्या भाजल्या गेल्या. त्यांच्या ओरडण्याचा आवाज ऐकून कुटुंबातील सदस्यांनी तात्काळ धाव घेत आग विझवली आणि त्यांना तातडीने सिन्नर येथील ग्रामीण रुग्णालयात दाखल केले. तिथे प्राथमिक उपचार केल्यानंतर त्यांची प्रकृती चिंताजनक असल्याने त्यांना पुढील उपचारासाठी जिल्हा रुग्णालयात हलवण्यात आले. मात्र, आठवडाभर मृत्यूशी झुंज दिल्यानंतर अखेर २० जून रोजी उपचारादरम्यान त्यांची प्राणज्योत मालवली. जिल्हा रुग्णालयाचे डॉ. सुयोग ठाकूर यांनी त्यांना तपासून मृत घोषित केले. या घटनेमुळे सांगळे वस्ती परिसरात प्रचंड हळहळ व्यक्त होत आहे. पुढील तपास पोलीस नाईक गुंजाळ करत आहेत.
अशी चूक कधीही करू नका!
एमआयडीसी किंवा कारखान्यांमधून आलेले प्लास्टिकचे ड्रम अनेकदा वेगवेगळ्या घातक केमिकलने माखलेले असतात. ते रिकामे वाटत असले तरी त्यात केमिकलचा गॅस (वाफ) कोंडलेला असतो. अशा ड्रमना गरम वस्तू, चाकू किंवा वेल्डिंग मशीन लावल्यास मोठा भडका उडतो किंवा थेट स्फोट होतो. नागरिकांनी घरकामासाठी असे ड्रम वापरताना अत्यंत काळजी घ्यावी आणि ते कापण्याचे धाडस करू नये, असे आवाहन पोलिसांनी केले आहे.
