नंदुरबार, (प्रतिनिधी) १ जुलै - गृहउद्योगासाठी मंजूर झालेल्या कर्जाची ३५ टक्के सबसिडी मिळवून दिल्याच्या मोबदल्यात ५ हजार रुपयांची लाच स्वीकारताना महाराष्ट्र राज्य खादी व ग्रामोद्योग मंडळाच्या वरिष्ठ पर्यवेक्षकाला लाचलुचपत प्रतिबंधक विभागाने (ACB) रंगेहात अटक केली. जिजाबराव साहेबराव चौधरी (वय ५६ वर्ष, वर्ग-३) असे अटक करण्यात आलेल्या लाचखोर अधिकाऱ्याचे नाव आहे. ही कारवाई मंगळवारी (३० जून) जिल्हाधिकारी कार्यालयाबाहेर टोकर तलाव रोडवर करण्यात आली.
काय आहे संपूर्ण प्रकरण?
तक्रारदार यांच्या नातलगाला सन २०२५ मध्ये महाराष्ट्र राज्य खादी व ग्रामोद्योग मंडळ, नंदुरबार यांच्याकडून 'पापड उद्योग आणि पीठ गिरणी' या गृहउद्योगासाठी १० लाख रुपयांचे कर्ज मंजूर झाले होते. या कर्जावर शासनाकडून ३५% सबसिडी मिळणार होती. ही सबसिडी मिळवून देण्यासाठी आरोपी जिजाबराव चौधरी याने हे प्रकरण आपल्या वरिष्ठ अधिकाऱ्यांमार्फत मुंबई येथील मुख्य कार्यालयात सादर केले होते. त्यानंतर तक्रारदाराच्या नातलगाच्या बँक खात्यात ३ लाख ५० हजार रुपयांची सबसिडी जमा देखील झाली.
'बक्षीस' म्हणून मागितली लाच
नातलगाला साडेतीन लाखांची सबसिडी मिळवून दिल्याच्या मोबदल्यात 'बक्षीस' म्हणून चौधरी याने तक्रारदाराकडे सुरुवातीला १० ते १२ हजार रुपयांची मागणी केली होती. अखेर तडजोडीअंती ५,००० रुपये देण्याचे ठरले. मात्र, तक्रारदाराची लाच देण्याची इच्छा नसल्याने त्यांनी या प्रकरणी लाचलुचपत प्रतिबंधक विभागाकडे (ACB) रीतसर तक्रार नोंदवली.
जिल्हाधिकारी कार्यालयाबाहेर रचला सापळा
तक्रारीची शहानिशा केल्यानंतर एसीबीच्या पथकाने मंगळवारी (दि. ३०) जिल्हाधिकारी कार्यालयाच्या बाहेर टोकर तलाव रोडवर सापळा रचला. ठरल्याप्रमाणे आरोपी जिजाबराव चौधरी याने तक्रारदाराकडून ५ हजार रुपयांची लाचेची रक्कम स्वीकारताच, दबा धरून बसलेल्या एसीबीच्या पथकाने त्याला रंगेहात दरोडा टाकून ताब्यात घेतले. या प्रकरणी नंदुरबार शहर पोलीस ठाण्यात गुन्हा दाखल करण्याची प्रक्रिया सुरू करण्यात आली आहे.
एसीबीची टीम आणि मार्गदर्शन
ही यशस्वी कारवाई नाशिक परिक्षेत्राचे पोलीस अधीक्षक भारत तांगडे, अप्पर पोलीस अधीक्षक प्रदीप मैराळे आणि अप्पर पोलीस अधीक्षक श्रीमती कविता फडतरे यांच्या मार्गदर्शनाखाली नंदुरबार एसीबीचे पोलीस उपअधीक्षक प्रशांत भरते, पोलीस निरीक्षक विकास लोंढे, सहाय्यक पोलीस उपनिरीक्षक विलास पाटील, अंमलदार विजय ठाकरे, देवराम गावीत, हेमंतकुमार महाले, नरेंद्र पाटील, जितेंद्र महाले, संदीप खंडारे आणि सुभाष पावरा यांच्या पथकाने केली. या प्रकरणाचा पुढील तपास पोलीस उपअधीक्षक प्रशांत भरते करत आहेत.
नागरिकांना आवाहन:
शासकीय कामासाठी कोणीही लाचेची मागणी केल्यास लाचलुचपत प्रतिबंधक विभाग, नंदुरबार यांच्याशी संपर्क साधावा.
टोल फ्री क्रमांक: १०६४
नंदुरबार एसीबी व्हॉट्सॲप क्रमांक: ९४२३५४१०६४
दूरध्वनी क्रमांक: ०२५६४-२३१००९
