नाशिक, (प्रतिनिधी) २५ जून - चार वर्षांच्या निष्पाप बालिकेस चॉकलेटचे आमिष दाखवून तिचा विनयभंग करणाऱ्या ६२ वर्षीय नराधमास जिल्हा व सत्र न्यायालयाने ५ वर्षे साधा कारावास आणि १० हजार रुपये दंडाची शिक्षा सुनावली आहे. सुकदेव तुकाराम पवार (वय ६२) असे शिक्षा सुनावण्यात आलेल्या आरोपीचे नाव आहे. सिडकोतील शिवशक्ती चौक भागात २६ मार्च २०२२ रोजी ही धक्कादायक घटना घडली होती.
नेमकी घटना काय?
२६ मार्च २०२२ रोजी सायंकाळच्या सुमारास अवघी चार वर्षे वयाची पीडित बालिका आपल्या घरासमोर खेळत होती. यावेळी आरोपी सुकदेव पवार याने बालिकेच्या बालमनाचा गैरफायदा घेत तिला चॉकलेटचे आमिष दाखवले आणि तिच्याशी लैंगिक कृत्य केले. याप्रकरणी पीडितेच्या नातेवाईकांनी दिलेल्या तक्रारीवरून अंबड पोलीस ठाण्यात विनयभंगासह बालकांचे लैंगिक अपराधापासून संरक्षण (पोक्सो) कायद्यान्वये गुन्हा दाखल करण्यात आला होता.
न्यायालयात गुन्हा सिद्ध
या गुन्ह्याचा तपास तत्कालीन पोलीस उपनिरीक्षक हरसिंग पावरा यांनी केला होता. त्यांनी अत्यंत बारकाईने तपास करून पुराव्यानिशी दोषारोपपत्र जिल्हा व सत्र न्यायालयात सादर केले. हा खटला कोर्ट क्र. १० च्या जिल्हा व सत्र न्यायाधीश के. के. पाटील यांच्यासमोर चालला.
खटल्यादरम्यान सरकारतर्फे अतिरिक्त सरकारी अभियोक्ता सुलभा सांगळे यांनी बाजू मांडली. न्यायालयाने फिर्यादी, साक्षीदार आणि पंच यांनी दिलेली साक्ष तसेच तपासी अधिकाऱ्यांनी सादर केलेले परिस्थितीजन्य पुरावे ग्राह्य धरून आरोपी सुकदेव पवार याला दोषी ठरवत पाच वर्षांचा साधा कारावास आणि दहा हजार रुपये दंडाची शिक्षा सुनावली.
तपास यंत्रणेची कामगिरी
तत्कालीन उपनिरीक्षक हरसिंग पावरा यांनी गोळा केलेले भक्कम पुरावे आणि सरकारी वकील सुलभा सांगळे यांनी न्यायालयात मांडलेली आक्रमक बाजू यामुळे नराधमाला अवघ्या काही वर्षांतच त्याच्या कृत्याची योग्य शिक्षा मिळाली.
