मुंबई, (प्रतिनिधी) २३ जून - उद्धव ठाकरे यांची साथ सोडून नुकताच शिवसेना शिंदे गटात प्रवेश केलेले खासदार संजय दिना पाटील यांनी ठाकरे गटातील एका स्थानिक नेत्याविरुद्ध अत्यंत आक्रमक आणि स्फोटक भूमिका घेतली आहे. "ठाकरे गटातील एका व्यक्तीने माझ्या घरासमोर येऊन शिव्या दिल्या. आमच्या नादाला लागाल तर घरात घुसून मारू. तुम्ही कितीही सुरक्षाव्यवस्था ठेवा, मी बॉम्ब टाकेन," असा थेट आणि खळबळजनक इशारा खासदार पाटील यांनी दिला आहे. त्यांच्या या विधानामुळे राजकीय वर्तुळात मोठी खळबळ उडाली आहे.
मातोश्रीवर जाण्यास तयार होतो, मात्र...
आपल्या संतापामागचे कारण स्पष्ट करताना खासदार संजय दिना पाटील म्हणाले, "ठाकरे गटातील त्या व्यक्तीने माझ्या घरासमोर येऊन हुल्लडबाजी करत शिव्या दिल्या होत्या. या घटनेनंतर, जर त्या व्यक्तीने माझ्या घरासमोर येऊनच माझी माफी मागितली, तर मी स्वतः 'मातोश्री'वर यायला तयार आहे, असे मी खुद्द उद्धव ठाकरे यांना सांगितले होते. मात्र, तसे झाले नाही."
'त्याची कुत्र्यासारखी अवस्था'; थेट शब्दांत हल्लाबोल
संबंधित नेत्याचा समाचार घेताना खासदार पाटील यांची जीभ घसरली. ते म्हणाले, "मी विभागप्रमुख म्हणून त्याला नेहमी खूप आदर दिला. मात्र आज त्याची कुत्र्यासारखी अवस्था झाली आहे. तो लोकांना सर्वांदेखत शिव्या देतो. त्याची चार लोकांसमोर उभे राहून मला शिव्या द्यायची हिंमत नाही. दुसऱ्यांच्या (दादा लोकांच्या) जीवावर वाघ बनणे आता त्यांनी सोडून द्यावे."
सुरक्षा व्यवस्था ठेवा, मी बॉम्ब टाकेन!
ठाकरे गटाला थेट आव्हान देताना खासदार संजय दिना पाटील यांनी कायदा-सुव्यवस्थेला आव्हान देणारे विधान केले. "आमच्या नादाला लागाल तर घरात घुसून मारू. तुम्ही स्वतःच्या रक्षणासाठी कितीही मोठी सुरक्षाव्यवस्था तैनात करा, मी बॉम्ब टाकेन," अशा अत्यंत तिखट आणि गंभीर शब्दांत त्यांनी आपला संताप व्यक्त केला. खासदार पाटील यांनी नुकताच शिंदे गटात प्रवेश केला असून, प्रवेशानंतर अवघ्या काही दिवसांतच त्यांनी ठाकरे गटाविरुद्ध अत्यंत आक्रमक पवित्रा घेतल्याने मुंबईतील राजकीय वातावरण चांगलेच तापण्याची शक्यता आहे.
