मुंबई, (प्रतिनिधी) २१ जून - गेल्या अनेक वर्षांपासून प्रलंबित असलेल्या महाराष्ट्र राज्य बियाणे महामंडळ मर्यादित (महाबीज), अकोला येथील अधिकारी व कर्मचाऱ्यांच्या सुधारित आकृतीबंधाला (Staff Pattern) राज्य शासनाने अखेर मंजुरी दिली आहे. कृषी विभागाने याबाबतचा अधिकृत शासन निर्णय (GR) जारी केला असून, एकूण ७२३ पदांच्या सुधारित आकृतीबंधाला मान्यता देण्यात आली आहे, अशी माहिती राज्याचे कृषी मंत्री दत्तात्रय भरणे यांनी दिली. या महत्त्वपूर्ण निर्णयामुळे महाबीजच्या कार्यक्षमतेत वाढ होणार असून, बियाणे उत्पादन, प्रक्रिया, गुणवत्ता नियंत्रण आणि वितरण व्यवस्थापन अधिक प्रभावीपणे राबवण्यास मदत मिळणार आहे.
पदरचनेचे पुनर्गठन: ७२३ पदांचे वर्गीकरण
नवीन शासन निर्णयानुसार, महाबीजच्या विद्यमान आकृतीबंधामध्ये बदल करून पदांची रचना खालीलप्रमाणे निश्चित करण्यात आली आहे:
नियमित पदे: ५६० (नियमित प्रशासकीय आणि तांत्रिक पदे)
अधिसंख्य पदे: १०० (ही पदे रिक्त झाल्यानंतर भविष्यात पुन्हा भरली जाणार नाहीत)
बाह्यस्त्रोत पदे (Outsourcing): ६३ (वाहनचालक, कनिष्ठ यंत्रचालक, शिपाई, पहरेकरी, लघुलेखक निम्न श्रेणी इत्यादी पदे बाह्यस्त्रोताद्वारे भरली जातील)
भविष्यातील रचना: सध्या एकूण पदे ७२३ असली, तरी भविष्यात अधिसंख्य पदे रिक्त झाल्यानंतर मंजूर नियमित पदांची संख्या ५६० इतकीच मर्यादित राहणार आहे. यापूर्वी ३० ऑक्टोबर २०१४ रोजी मंजूर करण्यात आलेल्या आकृतीबंधात एकूण ७३७ पदे होती.
'या' निर्णयाचा थेट फायदा राज्यातील शेतकऱ्यांना होणार!
या निर्णयाचे स्वागत करताना कृषी मंत्री दत्तात्रय भरणे म्हणाले,
"राज्यातील शेतकऱ्यांना दर्जेदार आणि प्रमाणित बियाण्यांचा वेळेवर पुरवठा करण्यासाठी 'महाबीज'ची भूमिका अत्यंत महत्त्वाची आहे. बदलत्या तांत्रिक गरजा आणि वाढलेला कार्यव्याप्ती लक्षात घेऊन हा निर्णय घेण्यात आला आहे. यामुळे संस्थेची प्रशासकीय व तांत्रिक क्षमता अधिक बळकट होईल आणि याचा थेट फायदा महाराष्ट्रातील बळीराजाला होईल."
नवीन सुधारित आकृतीबंधात विविध स्तरांवरील तांत्रिक, प्रशासकीय आणि क्षेत्रीय (Field Staff) पदांचा समावेश करण्यात आला असून, यामुळे महामंडळाच्या कामकाजाला कमालीची गती येण्याची शक्यता आहे.
