मुंबई, (प्रतिनिधी) २१ जून - राज्यातील महिला उद्योजकतेला बळ देण्यासाठी आणि महिलांच्या नेतृत्वाखालील स्टार्ट अप्सना जागतिक दर्जाची बाजारपेठ मिळवून देण्यासाठी कौशल्य, रोजगार, उद्योजकता व नावीन्यता विभागांतर्गत 'महाराष्ट्र राज्य नावीन्यता सोसायटी' आणि 'उदैती फाउंडेशन' यांच्यात मंत्रालयात एक महत्त्वपूर्ण सामंजस्य करार करण्यात आला आहे. या भागीदारीतून महाराष्ट्रात विशेष ‘महिला उद्योजकता स्टार्ट अप हब’ स्थापन करण्यात येणार असल्याची माहिती मुख्यमंत्री देवेंद्र फडणवीस यांनी दिली. कौशल्य व उद्योजकता मंत्री मंगलप्रभात लोढा यांच्या नेतृत्वाखाली हा करार करण्यात आला. महाराष्ट्र राज्य नावीन्यता सोसायटीचे मुख्य कार्यकारी अधिकारी डॉ. श्रीकांत पाटील आणि उदैती फाउंडेशनच्या संस्थापक मुख्य कार्यकारी अधिकारी पूजा शर्मा गोयल यांनी या करारावर स्वाक्षरी केली.
'अॅक्सेलरेटर मॉडेल'द्वारे मिळणार सर्वतोपरी सहाय्य
हा महिला स्टार्ट अप हब राज्यातील स्टार्ट अप परिसंस्थेमध्ये समन्वय साधणारे मुख्य व्यासपीठ म्हणून काम करेल.
व्यवसाय सहाय्य: महिला उद्योजकांना केवळ मार्गदर्शनच नाही, तर वित्तपुरवठा (Funding), बाजारपेठ आणि व्यवसाय वाढीसाठी लागणारे तांत्रिक सहाय्य मिळवून दिले जाईल.
शासकीय योजनांचा मेळ: राज्य व केंद्र शासनाच्या विविध कल्याणकारी योजनांचा थेट लाभ महिला स्टार्ट अप्सना मिळवून देण्यासाठी उदैती फाउंडेशन तांत्रिक भागीदार म्हणून काम करणार आहे.
कामगिरीवर लक्ष ठेवण्यासाठी 'गव्हर्नन्स डॅशबोर्ड'
या उपक्रमांतर्गत राज्यासाठी ‘महिला स्टार्ट अप निर्देशांक’ (Women Startup Index) विकसित केला जाणार आहे. जिल्हा व विभागनिहाय महिला उद्योजकतेच्या प्रगतीचा आढावा घेण्यासाठी एक विशेष 'गव्हर्नन्स डॅशबोर्ड' तयार करण्यात येईल. यामुळे आकडेवारीवर आधारित अचूक निर्णय घेणे प्रशासनाला सोपे होईल. तसेच या धोरणाच्या प्रभावी अंमलबजावणीसाठी एका 'आंतरविभागीय संचालन समिती'ची स्थापना देखील केली जाणार आहे.
'विकसित भारत २०४७' च्या उद्दिष्टाला गती
"उदैती फाउंडेशन हे भारतातील रोजगारक्षम परंतु सध्या बेरोजगार असलेल्या १५६ दशलक्ष महिलांना रोजगाराच्या प्रवाहात आणण्यासाठी कार्यरत आहे. या करारामुळे महिलांना उद्योग सुरू करण्यात येणारे अडथळे दूर होतील, तसेच महिला उद्योजिका केवळ स्वतःसाठीच नाही तर इतरांसाठीही रोजगार निर्माण करणाऱ्या बनतील."
— देवेंद्र फडणवीस, मुख्यमंत्री.
या ऐतिहासिक करारामुळे महाराष्ट्रात महिला उद्योजकांसाठी अत्यंत पोषक आणि उत्साही वातावरण तयार होणार असून, राज्याच्या आर्थिक प्रगतीत महिलांचा सहभाग लक्षणीयरीत्या वाढणार आहे.
