नाशिक, (प्रतिनिधी) १९ जून - नाशिक शहरातील मुंबई-आग्रा राष्ट्रीय महामार्ग क्रमांक ३ (NH-3) वरील उड्डाणपुलांवरून प्रवास करणाऱ्या वाहनचालकांसाठी एक अत्यंत महत्त्वाची बातमी आहे. गरवारे पॉईंट ते आडगाव दरम्यानच्या उड्डाणपुलांवरील वाहतूक अधिक सुरक्षित आणि सुटसुटीत करण्यासाठी पोलीस आयुक्त संदीप कर्णिक यांनी नवीन वाहतूक नियंत्रण अधिसूचना जारी केली आहे. ही सुधारित नियमावली उद्यापासून म्हणजेच शनिवार, २० जून २०२६ पासून संपूर्ण शहरात लागू होत आहे. या नवीन अधिसूचनेनुसार, उड्डाणपुलांवरील वाहनांची गती वाढवण्यास मंजुरी देण्यात आली असली, तरी सुरक्षेचा उपाय म्हणून दुचाकींसह संथ चालणाऱ्या वाहनांना पुलावरून जाण्यास पूर्णपणे बंदी घालण्यात आली आहे.
अशी असेल नवीन वेग मर्यादा (Speed Limit):
NHAI, प्रादेशिक परिवहन विभाग, महानगरपालिका आणि पोलीस प्रशासन यांच्या संयुक्त बैठकीत झालेल्या निर्णयानुसार वाहनांची सुधारित वेग मर्यादा खालीलप्रमाणे निश्चित करण्यात आली आहे:
अ.क्र. वाहनांचा प्रकार नवीन वेग मर्यादा
१हलकी वाहने (LMV) ७० कि.मी. प्रति तास
२अवजड वाहने (Heavy Vehicles) ६० कि.मी. प्रति तास
उड्डाणपुलावर 'या' वाहनांना 'नो-एन्ट्री'!
हायवेवरील वाढता वेग आणि अपघातांचा धोका लक्षात घेता, इंदिरानगर जॉगिंग ट्रॅक ते आडगाव उड्डाणपुलावर खालील वाहनांना प्रवेश बंदी करण्यात आली आहे:
दुचाकी वाहने आणि मोटार सायकल
सायकली आणि तीन चाकी वाहने / रिक्षा
एस.व्ही. (SV Loading) वाहने
बैलगाड्या, घोडागाड्या आणि हातगाड्या
लेन शिस्त पाळणे बंधनकारक; नियमांचे उल्लंघन केल्यास कारवाई!
सर्व वाहनचालकांनी पुलावरून प्रवास करताना 'लेन डिसिप्लिन' (लेन शिस्त) पाळणे बंधनकारक राहील. विशेषतः अवजड वाहनांनी उजव्या बाजूच्या फास्ट लेनचा (जलद मार्गिका) वापर करू नये, असे स्पष्ट करण्यात आले आहे. या नियमांचे उल्लंघन करणाऱ्यांवर मोटार वाहन अधिनियमांतर्गत कडक दंडात्मक कारवाई केली जाईल.
अत्यावश्यक सेवांना नियमातून सूट
हा आदेश सर्वसामान्यांसाठी लागू असला तरी आणीबाणीच्या प्रसंगासाठी काही अपवाद ठेवण्यात आले आहेत. पोलीस वाहने, रुग्णवाहिका, अग्निशमन दलाच्या गाड्या, शववाहिका आणि इतर सर्व आपत्कालीन व अत्यावश्यक सेवांमधील वाहनांना या निर्बंधांमधून पूर्णपणे वगळण्यात आले आहे.
