एस.के. खेडकर, (नाशिक) १२ जून - नाशिकमधील सातपूर येथील नामांकित 'स्वातंत्र्यवीर सावरकर शासकीय औद्योगिक प्रशिक्षण संस्थेत' (ITI) ऑगस्ट २०२६ च्या सत्रासाठी ऑनलाइन प्रवेश प्रक्रिया सुरू झाली आहे. १० वी उत्तीर्ण किंवा अनुत्तीर्ण असलेल्या इच्छुकांनी प्रवेशासाठी admission.dvet.gov.in या अधिकृत संकेतस्थळावर ऑनलाईन अर्ज सादर करावेत, असे आवाहन संस्थेचे उपसंचालक आर. एस. मुंडासे यांनी केले आहे. ही प्रवेश प्रक्रिया २२ मे २०२६ पासूनच पोर्टलवर उपलब्ध करून देण्यात आली आहे. कौशल्य विकास व उद्योजकता विभागांतर्गत चालवल्या जाणाऱ्या या संस्थेत अभियांत्रिकी (Engineering) आणि बिगर-अभियांत्रिकी क्षेत्रातील एक व दोन वर्ष कालावधीचे विविध रोजगाराभिमुख अभ्यासक्रम उपलब्ध आहेत.
पारंपरिक ते अत्याधुनिक: ५० हून अधिक कोर्सेस उपलब्ध
संस्थेमध्ये विद्यार्थ्यांना काळाच्या गरजेनुसार खालील महत्त्वाच्या ट्रेड्समध्ये गुणवत्तापूर्ण प्रशिक्षण दिले जाते:
पारंपरिक व तांत्रिक ट्रेड्स: इलेक्ट्रिशियन, वायरमन, फिटर, टर्नर, मशिनिस्ट, वेल्डर, प्लंबर, सुतारकाम, गवंडी, शीट मेटल वर्कर, मोटर मेकॅनिक आणि डिझेल मेकॅनिक.
आयटी आणि कॉम्प्युटर क्षेत्र: कॉम्प्युटर ऑपरेटर अँड प्रोग्रामिंग असिस्टंट (COPA), आयसीटी सिस्टिम मेंटेनन्स आणि स्टेनोग्राफर.
नवयुगीन कोर्सेस (New-Age Courses): केंद्र सरकारच्या मॉडेल आयटीआय योजनेअंतर्गत 'इंटरनेट ऑफ थिंग्ज' (IoT) हा आधुनिक कोर्स उपलब्ध आहे.
विमाननिर्मिती क्षेत्रातील 'विशेष' अभ्यासक्रम
जागतिक बँक सहाय्यित ‘स्ट्राइव्ह’ (STRIVE) योजनेअंतर्गत या संस्थेत ‘ॲरोनॉटिकल स्ट्रक्चर ॲण्ड इक्वीपमेंट फिटर’ हा विमाननिर्मिती उद्योगाशी संबंधित अत्यंत आधुनिक अभ्यासक्रम सुरू करण्यात आला आहे. संरक्षण आणि विमान वाहतूक क्षेत्रात करिअर करू इच्छिणाऱ्या नाशिकच्या विद्यार्थ्यांसाठी ही सुवर्णसंधी आहे.
ऑन जॉब ट्रेनिंग (OJT) आणि नामांकित कंपन्यांमध्ये प्लेसमेंट
प्रशिक्षण केवळ पुस्तकी न राहता अधिक परिणामकारक व्हावे, यासाठी संस्थेत 'ऑन जॉब ट्रेनिंग' (OJT) राबवले जाते. याद्वारे विद्यार्थ्यांना नामांकित कंपन्यांमध्ये प्रत्यक्ष कामाचा अनुभव मिळतो. सर्व व्यवसायांच्या विद्यार्थ्यांना १००% शिकाऊ उमेदवारी (Apprenticeship) योजना लागू आहे.
दरवर्षी आयोजित केल्या जाणाऱ्या रोजगार मेळाव्यांमध्ये सिमेन्स, टाटा मोटर्स, क्रॉम्टन ग्रीव्हज्, महिंद्रा ॲण्ड महिंद्रा, बॉश, एच.ए.एल (HAL), एबीबी (ABB), आणि व्हि.आय.पी यांसारख्या बहुराष्ट्रीय कंपन्यांमध्ये विद्यार्थ्यांची थेट निवड होते.
विद्यार्थ्यांना मिळणाऱ्या सवलती आणि सोयी-सुविधा:
जागतिक दर्जाच्या सुसज्ज कार्यशाळा आणि डिजिटल लायब्ररी.
सर्व प्रशिक्षणार्थींना दरमहा ५०० रुपये विद्यावेतन.
आदिवासी प्रशिक्षणार्थींसाठी स्वतंत्र ५०० रुपये निर्वाह भत्ता.
एसटी बस आणि रेल्वे पास सवलत सुविधा.
तंत्रप्रदर्शने, क्रीडा स्पर्धा आणि जागतिक कौशल्य स्पर्धांमध्ये सहभागाची संधी.
कौशल्यपूर्ण मनुष्यबळाला उद्योगात मोठी मागणी असल्याने विद्यार्थ्यांनी विहित वेळापत्रकानुसार ऑनलाईन अर्ज भरून प्रवेश प्रक्रिया पूर्ण करावी. अधिक माहितीसाठी सातपूर येथील आयटीआय संस्थेशी थेट संपर्क साधावा, असे उपसंचालक मुंडासे यांनी स्पष्ट केले आहे.
