नागपूर, (प्रतिनिधी) ९ जून - एनसीसी (NCC) संचालनालय महाराष्ट्राने 'पंतप्रधान इंटर्नशिप योजने'अंतर्गत (PMIS) राज्यातील एनसीसी छात्र आणि माजी छात्रांसाठी एक मोठा युवा कौशल्य विकास आणि रोजगारक्षमता उपक्रम सुरू केला आहे. एनसीसी कॅडेट्सना उद्योग क्षेत्रातील मोठ्या संधी, भविष्य-अनुकूल कौशल्ये आणि अर्थपूर्ण करिअरचे मार्ग उपलब्ध करून देणे हा यामागचा मुख्य उद्देश आहे. या उपक्रमाच्या पहिल्या टप्प्याचा भाग म्हणून, 'लेमन ट्री हॉटेल्स'च्या भागीदारीत विशेष प्लेसमेंट कॅम्प आयोजित केले जात आहेत, ज्याद्वारे संपूर्ण महाराष्ट्रातील पात्र पदवीधरांना थेट इंटर्नशिपच्या संधी प्रदान केल्या जाणार आहेत.
पुणे आणि मुंबईत 'प्लेसमेंट कॅम्प'; १५० पदे उपलब्ध
या उपक्रमांतर्गत एनसीसी सीनियर डिव्हिजन आणि सीनियर विंग कॅडेट्स तसेच माजी कॅडेट्ससाठी एकूण १५० इंटर्नशिपच्या संधी उपलब्ध असतील. भरती शिबिरांचे वेळापत्रक खालीलप्रमाणे आहे:
पुणे कॅम्प: १५ जून २०२६ रोजी 'लेमन ट्री प्रीमियर' (सिटी सेंटर, पुणे) येथे ५० पदांसाठी भरती होईल.
मुंबई कॅम्प: १६ जून २०२६ रोजी 'लेमन ट्री प्रीमियर' (मुंबई) येथे १०० पदांसाठी भरती प्रक्रिया राबवली जाईल.
या इंटर्नशिपच्या माध्यमातून कॅडेट्सना मानवी संसाधन (HR), विक्री (Sales), फ्रंट ऑफिस ऑपरेशन्स, वित्त (Finance), अन्न आणि पेय सेवा (F&B) आणि खरेदी संस्था व स्टोअर्स यामध्ये थेट कामाचा व्यावहारिक व्यावसायिक अनुभव आणि उद्योग-संबंधित कौशल्ये आत्मसात करता येतील. विशेष म्हणजे, निवडलेल्या उमेदवारांना पंतप्रधान इंटर्नशिप योजनेअंतर्गत मासिक विद्यावेतन (Stipend) आणि तज्ज्ञांचे मार्गदर्शनही मिळणार आहे.
महिला छात्रांसाठी विशेष सुविधा आणि तांत्रिक प्रशिक्षण
महिलांच्या सहभागाचे महत्त्व ओळखून, पात्र महिला छात्रांसाठी निवास व्यवस्था आणि अतिरिक्त निर्वाह भत्ता यांसारख्या सुविधा पुरवण्याचे प्रयत्न महाराष्ट्र सरकारच्या समन्वयाने सुरू आहेत.
केवळ इंटर्नशिपपुरते मर्यादित न राहता, एनसीसी महाराष्ट्र पद्धतशीर प्रशिक्षण कार्यक्रमांद्वारे छात्रांना भविष्य-अनुकूल कौशल्यांनी सज्ज करत आहे. यामध्ये खालील बाबींचा समावेश आहे:
ड्रोन पायलट प्रशिक्षण आणि प्रमाणन
सायबर डिफेंडर आणि सायबर सुरक्षा कार्यक्रम
आपत्ती व्यवस्थापन आणि आपत्कालीन प्रतिसाद
नागरी संरक्षण आणि समुदाय लवचिकता
शिक्षण ते रोजगार असा नवा प्रवास: मेजर जनरल विवेक त्यागी
"एनसीसी हे नेहमीच एक शिस्तबद्ध आणि सक्षम नागरिक घडवण्याचे व्यासपीठ राहिले आहे. आता आम्ही नेतृत्व विकासाला थेट रोजगार आणि भविष्यासाठी सज्ज करणाऱ्या कौशल्यांशी जोडत आहोत. तंत्रज्ञान, उत्पादन, लॉजिस्टिक्स आणि वित्तीय सेवा यांसारख्या विविध क्षेत्रांतील अतिरिक्त कॉर्पोरेट भागीदारांशी आमचा संपर्क सुरू असून, तरुणांसाठी रोजगाराची सातत्यपूर्ण साखळी निर्माण केली जाईल. पुणे आणि मुंबई येथील प्लेसमेंट कॅम्प ही एका मोठ्या प्रवासाची सुरुवात आहे."
— मेजर जनरल विवेक त्यागी (अतिरिक्त महासंचालक, एनसीसी महाराष्ट्र)
नजीकच्या एनसीसी केंद्राशी संपर्क साधण्याचे आवाहन
पंतप्रधान नरेंद्र मोदी यांच्या युवा सक्षमीकरणाच्या दूरदृष्टीशी आणि मुख्यमंत्री देवेंद्र फडणवीस यांच्या महाराष्ट्रातील तरुणांना विस्तारित संधी उपलब्ध करून देण्याच्या वचनबद्धतेशी हा उपक्रम सुसंगत आहे. महाराष्ट्र एनसीसी सध्या राज्यातील सर्व ३६ जिल्ह्यांमधील २,००0 शैक्षणिक संस्थांच्या माध्यमातून तब्बल १.५ लाख छात्रांना प्रशिक्षण देत आहे. पात्र एनसीसी छात्र आणि माजी छात्रांनी या भरती शिबिरांमध्ये सहभागी होण्यासाठी आपल्या नजीकच्या एनसीसी केंद्राशी त्वरित संपर्क साधावा, असे आवाहन संचालनालयातर्फे करण्यात आले आहे.
