नाशिक, (प्रतिनिधी) ३० मे - व्यवसायातील स्पर्धेतून आणि किरकोळ कारणावरून दोन खाद्यपदार्थ विक्रेत्यांमध्ये जोरदार हाणामारी झाल्याची धक्कादायक घटना नाशिकरोड भागातील जामा मशीद परिसरात घडली आहे. ग्राहकांना बाजूला उभे करण्यास सांगितल्याचा राग आल्याने एका विक्रेत्याने दुसऱ्या विक्रेत्याला हातातील लोखंडी कड्याने (वजनी कडे) मारहाण करून जखमी केले. याप्रकरणी नाशिकरोड पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, सागर अनिल शिंदे असे गुन्हा दाखल करण्यात आलेल्या संशयित व्यवसायिकाचे नाव आहे. याप्रकरणी विशाल गणपत गोसावी (रा. देवळालीगाव) यांनी फिर्याद दिली आहे.
'सद्गुरू वडापाव' विरुद्ध 'संघर्ष समोसा'
फिर्यादी विशाल गोसावी यांचा नाशिकरोड येथील जामा मशीद पाठीमागे रस्त्याच्या कडेला 'सद्गुरू वडापाव' नावाचा खाद्यपदार्थ विक्रीचा व्यवसाय आहे. याच ठिकाणी संशयित सागर शिंदे यानेही 'संघर्ष समोसा आणि वडापाव सेंटर' नावाचे दुकान थाटले आहे. एकाच ठिकाणी एकाच स्वरूपाचा व्यवसाय असल्याने दोन्ही व्यवसायिकांमध्ये अंतर्गत स्पर्धा होती.
...आणि वादाची ठिणगी पडली
गुरुवारी (दि. २८ मे) रात्रीच्या सुमारास दोन्ही व्यवसायिकांच्या गाड्यांवर ग्राहकांची मोठी गर्दी झाली होती. यावेळी 'संघर्ष समोसा सेंटर'चे काही ग्राहक गोसावी यांच्या वडापाव दुकानाच्या समोर उभे होते.
कारणाचा वाद: गोसावी यांनी संशयित शिंदे याला, "तुझ्या ग्राहकांना थोडे बाजूला उभे कर," असे सांगितले.
शिवीगाळ आणि मारहाण: या किरकोळ बोलण्याचा राग आल्याने संशयित सागर शिंदे याने गोसावी यांना थेट अश्लील शिवीगाळ करण्यास सुरुवात केली आणि मारहाण केली.
लोखंडी कड्याने हल्ला: "तुझ्याकडे बघूनच घेतो," अशी धमकी देत शिंदे याने आपल्या हातातील वजनी लोखंडी कडे काढून गोसावी यांच्यावर हल्ला केला. या हल्ल्यात गोसावी गंभीर जखमी झाले आहेत.
या घटनेमुळे परिसरात काही काळ तणाव निर्माण झाला होता. घटनेची माहिती मिळताच पोलिसांनी घटनास्थळी धाव घेतली. सध्या पोलीस हवालदार गायकवाड या प्रकरणाचा अधिक तपास करत आहेत.
