नाशिक, (प्रतिनिधी) २३ मे - नाशिकमधील एका नामांकित शिक्षण संस्थेत मोठ्या हुद्द्यावर नोकरी लावून देण्याच्या बहाण्याने एका बेरोजगार तरुणासह त्याच्या नातेवाईकांचा विश्वास संपादन करून तब्बल ३३ लाख १६ हजार ५०० रुपयांची आर्थिक फसवणूक केल्याचा धक्कादायक प्रकार समोर आला आहे. वर्ष उलटूनही नोकरी न लागल्याने आणि दिलेले पैसेही परत न मिळाल्याने अखेर फसवणूक झालेल्या उच्चशिक्षित तरुणाने पोलिसांत धाव घेतली. याप्रकरणी गंगापूर पोलीस ठाण्यात गुन्हा दाखल करण्यात आला असून पोलिसांनी संशयित ठकबाजाला तात्काळ अटक केली आहे.
ओळख असल्याचा बहाणा करून लावला गळ
पोलिसांनी दिलेल्या माहितीनुसार, अमोल श्रीधर यादव (वय ३६, रा. महालक्ष्मी बंधन अपार्टमेंट, खंडेराव मंदिराजवळ, ध्रुवनगर, नाशिक) या तरुणाने याप्रकरणी फिर्याद दिली आहे. अमोल यादव हा उच्चशिक्षित असून नोकरीच्या शोधात होता. यादरम्यान त्याची ओळख संशयित भाऊराव शंकर खुटे (वय ५४, रा. गुलमोहर हाऊसिंग सोसायटी, ध्रुवनगर, नाशिक) याच्याशी झाली. भाऊरावने नाशिकमधील नामांकित 'भोसला मिलिटरी स्कूल' (Bhonsala Military School) मध्ये आपली मोठी उठबस आणि ओळख असल्याचे यादवला भासवले. तेथे चांगल्या पगाराची कायमस्वरूपी नोकरी मिळवून देण्याची पक्की हमी त्याने दिली.
८ महिन्यात तब्बल ३३ लाख उकळले
अमोल यादवचा पूर्ण विश्वास संपादन केल्यानंतर संशयित भाऊराव खुटे याने यादवच्या इतर सुशिक्षित नातेवाईकांनाही आपल्या जाळ्यात ओढले. नोकरीच्या वेगवेगळ्या शासकीय व संस्थात्मक प्रक्रियांचे कारण पुढे करत संशयिताने जानेवारी ते ऑगस्ट २०२५ या अवघ्या आठ महिन्यांच्या कालावधीत यादव आणि त्यांच्या नातेवाईकांकडून टप्प्याटप्प्याने एकूण ३३ लाख १६ हजार ५०० रुपये रोख व ऑनलाईन माध्यमातून उकळले.
वर्षभर केवळ टाळाटाळ; अखेर पोलिसांचा दणका
पैसे देऊन वर्ष उलटून गेले, तरीही कोणालाच नोकरीचे कॉल लेटर मिळाले नाही. त्यामुळे फसवणूक झाल्याची शंका आल्याने यादव आणि त्यांच्या कुटुंबीयांनी भाऊरावकडे पैशांसाठी तगादा लावला. मात्र, संशयिताने पैसे देण्यास स्पष्ट नकार देत टाळाटाळ सुरू केली. आपली फसवणूक झाल्याचे पूर्णपणे खात्रीशीर झाल्यानंतर यादवने गंगापूर पोलीस ठाण्यात तक्रार दाखल केली.
गंगापूर पोलिसांनी घटनेचे गांभीर्य ओळखून संशयित भाऊराव खुटे याच्याविरुद्ध फसवणुकीचा गुन्हा दाखल करून त्याला गजाआड केले आहे. या रॅकेटमध्ये आणखी कोणाचा सहभाग आहे का, याचा पुढील तपास सहाय्यक पोलीस निरीक्षक महाजन करत आहेत.
पोलिसांचे आवाहन :
कोणत्याही नामांकित शिक्षण संस्थेत किंवा शासकीय विभागात पैशांच्या आमिषाने नोकऱ्या मिळत नाहीत. अशा प्रकारे मोठ्या ओळखीचा बहाणा करून पैसे मागणाऱ्या मध्यस्थांना बळी पडू नका आणि फसवणूक झाल्यास तातडीने पोलिसांशी संपर्क साधा.