नवी दिल्ली, (प्रतिनिधी) २३ मे - भारतीय रेल्वेने गाड्या, प्रवासी, स्थानक परिसर आणि रेल्वेच्या अथांग जाळ्याची सुरक्षितता अधिक कडक करण्यासाठी आधुनिक तंत्रज्ञानाचा दणकट वापर सुरू केला आहे. रेल्वे सुरक्षा दल (RPF) आता कृत्रिम बुद्धिमत्ता (AI), ड्रोन आणि अत्याधुनिक सीसीटीव्ही कॅमेऱ्यांच्या मदतीने समाजकंटकांवर बारीक लक्ष ठेवणार आहे. रेल भवन येथे केंद्रीय रेल्वेमंत्री अश्विनी वैष्णव यांच्या अध्यक्षतेखाली पार पडलेल्या एका अत्यंत महत्त्वाच्या उच्च-स्तरीय सुरक्षा आढावा बैठकीत हा निर्णय घेण्यात आला.
या बैठकीला रेल्वे मंडळाच्या अध्यक्षांसह केंद्रीय रेल्वे राज्यमंत्री व्ही. सोमण्णा आणि रवनीतसिंह बिट्टू यांच्यासह देशभरातील क्षेत्रीय अधिकारी उपस्थित होते.
घातपाताचे प्रयत्न उधळणार; तपासात मोठे खुलासे
गेल्या काही दिवसांत रेल्वे गाड्यांमध्ये घडलेल्या आगीच्या घटना आणि इतर दुर्घटनांच्या प्राथमिक तपासामध्ये काही समाज-विघातक घटकांचा सहभाग असल्याचे समोर आले आहे. भारतीय रेल्वेने या घटना अत्यंत गांभीर्याने घेतल्या असून आरपीएफ या प्रकरणांचा कसून तपास करत आहे. रेल्वे प्रशासनाने वेळेवर केलेल्या सक्रिय कारवाईमुळे अनेक मोठे अपघात टळले आहेत. आता यापुढे संभाव्य धोके टाळण्यासाठी गुप्तचर यंत्रणा अधिक बळकट केली जात आहे.
प्रवाशांनी सतर्क राहावे, '१३९' वर संपर्क साधावा
केवळ तंत्रज्ञानावर अवलंबून न राहता रेल्वेने आता प्रवाशांनाही या सुरक्षा मोहिमेत भागीदार होण्याचे आवाहन केले आहे. प्रवासादरम्यान किंवा स्थानक परिसरात कोणतीही संशयास्पद व्यक्ती, वस्तू किंवा कृती आढळल्यास प्रवाशांनी तातडीने १३९ या रेल्वे हेल्पलाइन क्रमांकावर माहिती द्यावी, जेणेकरून संभाव्य अनर्थ टाळता येईल.
बैठकीतील महत्त्वाचे धोरणात्मक निर्णय:
अत्याधुनिक तंत्रज्ञान: संपूर्ण रेल्वे नेटवर्कमध्ये कृत्रिम बुद्धिमत्ता (AI) आधारित देखरेख यंत्रणा, अत्याधुनिक कॅमेरे आणि ड्रोनचा वापर वाढवणे.
यंत्रणांमध्ये समन्वय: रेल्वे सुरक्षा दल (RPF) आणि सरकारी रेल्वे पोलीस (GRP) यांच्यात गुप्त माहितीची देवाणघेवाण जलद करून समन्वय अधिक बळकट करणे.
सायबर सुरक्षा: रेल्वेच्या तांत्रिक प्रणालीला सुरक्षित ठेवण्यासाठी सायबर सुरक्षेचे बळकटीकरण करणे.
२४ तास देखरेख: रेल्वे मंडळाचे मुख्यालय आणि प्रादेशिक विभाग यांच्यात थेट संवाद वाढवून २४ तास सुरक्षा नियंत्रण ठेवणे.