सिंधुदुर्गनगरी, (प्रतिनिधी) २० मे - निसर्गसौंदर्य आणि ऐतिहासिक किल्ल्यांसाठी प्रसिद्ध असलेल्या सिंधुदुर्ग जिल्ह्याच्या शिरपेचात आता जागतिक दर्जाचा मानाचा तुरा रोवला जाणार आहे. सिंधुदुर्ग जिल्ह्यातील निवती रॉक्स परिसरात भारतातील पहिले अंडरवॉटर म्युझियम (समुद्राखालील संग्रहालय), कृत्रिम समुद्री प्रवाळ प्रकल्प आणि पाणबुडी पर्यटन प्रकल्प साकारत आहे. या महत्त्वाकांक्षी प्रकल्पामुळे सिंधुदुर्ग हे केवळ समुद्रकिनाऱ्यांपुरते मर्यादित न राहता ‘अंडरवॉटर टुरिझम डेस्टिनेशन’ म्हणून जागतिक नकाशावर झळकणार आहे, अशी घोषणा जिल्हाधिकारी तृप्ती धोडमिसे यांनी केली आहे. तारकर्ली जवळील इसदा येथे आयोजित विशेष पत्रकार परिषदेत त्या बोलत होत्या. यावेळी एमटीडीसीचे (MTDC) व्यवस्थापकीय संचालक निलेश गटणे यांच्यासह माझगाव शिपयार्ड आणि पाणबुडी तज्ज्ञ उपस्थित होते.
'आयएनएस गुलदार' युद्धनौकेचा समुद्रात नवा प्रवास
भारतीय नौदलात जवळपास चार दशके शौर्य गाजवणारी 'आयएनएस गुलदार' (INS Guldar) ही युद्धनौका सेवामुक्त झाली आहे. आता या ऐतिहासिक युद्धनौकेचे रूपांतर समुद्राखालील अद्वितीय पर्यटन केंद्रात केले जाणार आहे.
खोली: समुद्रतळापासून सुमारे २२ मीटर खोलीवर हे जहाज सुरक्षितपणे विसर्जित (स्थापित) केले जाईल.
पाणबुडी पर्यटन: हे विस्मयकारक दृश्य पर्यटकांना दाखवण्यासाठी एका विशेष पाणबुडीचे (Submarine) काम सुरू असून, पुढील दीड वर्षात ही पाणबुडी पर्यटकांच्या सेवेत दाखल होईल.
कृत्रिम प्रवाळ आणि पर्यावरण संवर्धन
हा प्रकल्प केवळ पर्यटनापुरता मर्यादित नसून सागरी जीवसृष्टीसाठी एक वरदान ठरणार आहे.
ज्या निवती रॉक्स परिसरात हे म्युझियम होत आहे, तिथे नैसर्गिक प्रवाळ (Corals) नाहीत. त्यामुळे तिथे कृत्रिम प्रवाळ तयार करून सागरी जिवांना पोषक अधिवास दिला जाईल.
गोव्याच्या 'राष्ट्रीय समुद्र विज्ञान संस्थेमार्फत' (NIO) याचा सखोल वैज्ञानिक अभ्यास करण्यात आला आहे.
सुरक्षा कवच: जहाजातील सर्व घातक व प्रदूषणकारक घटक आधीच साफ करण्यात आले आहेत. तसेच, या जहाजाच्या ५०० मीटर परिसरात मासेमारी आणि जहाजांचे अँकर (नांगर) टाकण्यास पूर्णपणे बंदी असेल.
पर्यटकांना काय अनुभव मिळणार?
साहसी पर्यटनाची आवड असणाऱ्यांसाठी हा प्रकल्प म्हणजे पर्वणीच ठरेल. येथे पर्यटकांना:
स्कुबा डायव्हिंग आणि अंडरवॉटर एक्सप्लोरेशन (समुद्रतळ सफर)
समुद्राच्या तळाशी विसावलेली युद्धनौका आणि तिच्याभोवती फिरणारे रंगीबेरंगी मासे पाहण्याची संधी
अंडरवॉटर फोटोग्राफी आणि गाईडेड डायव्हिंग टूर
समुद्र विज्ञान आणि संशोधनाचा अनोखा अनुभव
स्थानिक अर्थव्यवस्थेला आणि रोजगाराला मोठी गती
"या प्रकल्पामुळे देश-विदेशातील पर्यटक सिंधुदुर्गाकडे आकर्षित होतील. यामुळे केवळ राज्याच्या पर्यटनालाच नवी दिशा मिळणार नाही, तर स्थानिक युवकांसाठी स्कुबा डायव्हिंग ट्रेनर, गाईड्स, बोट सेवा, हॉटेल व्यावसायिक आणि फोटोग्राफीच्या माध्यमातून मोठ्या प्रमाणावर रोजगाराच्या संधी निर्माण होतील."
– तृप्ती धोडमिसे, जिल्हाधिकारी, सिंधुदुर्ग
थोडक्यात काय तर...
पर्यटन, इतिहास आणि पर्यावरण संवर्धनाचा हा त्रिवेणी संगम महाराष्ट्राच्या आणि देशाच्या पर्यटन इतिहासातील एक मैलाचा दगड ठरणार हे नक्की!
?s=20