मुंबई, (प्रतिनिधी) १७ मे - मुंबई आंतरराष्ट्रीय विमानतळावर महसूल गुप्तचर संचालनालयाने (DRI) अमली पदार्थांच्या तस्करीविरोधात दोन मोठ्या कारवाया केल्या आहेत. आंतरराष्ट्रीय ड्रग्ज तस्करांचे दोन वेगवेगळे प्रयत्न हाणून पाडत डीआरआयने १३ कोटी २९ लाख ५० हजार रुपये किमतीचे एकूण २.६५९ किलो कोकेन जप्त केले आहे. या प्रकरणी अमली पदार्थ प्रतिबंधक कायद्यांतर्गत (NDPS Act) एका महिलेसह दोन जणांना अटक करण्यात आली आहे.
कारवाई १: सामानात लपवले होते द्रव स्वरूपातील कोकेन
डीआरआयच्या मुंबई शाखेला मिळालेल्या अचूक गोपनीय माहितीच्या आधारे अधिकाऱ्यांनी अदिस अबाबाहून आलेल्या एका महिला प्रवाशाला विमानतळावर संशयावरून अडवले. तिच्या सामानाची बारकाईने तपासणी केली असता, अधिकाऱ्यांना धक्काच बसला. तिच्या बॅगेत द्रव स्वरूपातील (Liquid Form) कोकेन असलेल्या आठ पुड्या लपवून ठेवल्या होत्या. या कारवाईत ७.८७५ कोटी रुपये किमतीचे १.५७५ किलो द्रव कोकेन जप्त करण्यात आले.
कारवाई २: पोटातून बाहेर काढल्या ७० ड्रग्ज कॅप्सूल्स
दुसऱ्या एका थरारक कारवाईत, मुंबई विमानतळावर उतरलेल्या एका आफ्रिकन पुरुष प्रवाशाला डीआरआयच्या पथकाने ताब्यात घेतले. तपासणीदरम्यान या प्रवाशाने अमली पदार्थांच्या कॅप्सूल्स गिळल्याचे उघड झाले. त्यानंतर वैद्यकीय प्रक्रियेद्वारे या प्रवाशाच्या पोटातून एकूण ७० कॅप्सूल्स बाहेर काढण्यात आल्या. या कॅप्सूल्समधून ५.४२ कोटी रुपये किमतीचे १.०८४ किलो शुद्ध कोकेन जप्त करण्यात आले आहे.
'नशामुक्त भारत' मोहिमेतंर्गत पुढील तपास सुरू
जप्त करण्यात आलेला सर्व प्रतिबंधित माल आणि कोकेन एनडीपीएस (NDPS) कायदा, १९८५ च्या तरतुदींनुसार जप्त करण्यात आला आहे. दोन्ही आरोपींना अटक करून न्यायालयाने त्यांना कोठडी सुनावली आहे.
"सार्वजनिक आरोग्य आणि राष्ट्रीय सुरक्षेचे रक्षण करण्यासाठी आंतरराष्ट्रीय अमली पदार्थ तस्करांविरोधात अशीच कठोर कारवाई सुरू राहील. 'नशामुक्त भारत' घडवण्यासाठी डीआरआय कटिबद्ध आहे."
— डीआरआय (DRI) अधिकृत प्रसिद्धीपत्रक
या दोन्ही कारवायांवरून आंतरराष्ट्रीय ड्रग्ज सिंडिकेटचे जाळे किती मोठे आहे हे पुन्हा एकदा स्पष्ट झाले असून, या रॅकेटच्या मुळाशी पोहोचण्यासाठी आणि मुख्य सूत्रधाराचा शोध घेण्यासाठी डीआरआयने आता तपास अधिक तीव्र केला आहे.