नाशिक, (विशेष प्रतिनिधी) १७ मे - जागतिक पातळीवर कार्यरत असलेल्या नाशिकमधील 'दातार कॅन्सर जेनेटिक्स' (DCG) या नामवंत प्रिसिजन ऑन्कोलॉजी कंपनीने वैद्यकीय संशोधन क्षेत्रात ऐतिहासिक कामगिरी केली आहे. कंपनीने विकसित केलेल्या सर्व प्रकारच्या ट्यूमरसाठीच्या (Solid Tumours) 'सेलडीएक्स-टिश्यू' (CellDx-Tissue) या विशेष चाचणीला अमेरिकेच्या अन्न आणि औषध प्रशासनाने (US FDA) अधिकृत मंजुरी दिली आहे. नाशिकसारख्या शहरातून जागतिक स्तरावर मिळवलेले हे यश भारताच्या वैद्यकीय क्षेत्रासाठी अत्यंत अभिमानास्पद मानले जात आहे.
काय आहे 'CellDx-Tissue' चाचणी?
'सेलडीएक्स-टिश्यू' ही एक गुणात्मक इन विट्रो डायग्नोस्टिक (IVD) चाचणी आहे. यामध्ये सॉलिड ट्यूमर (कर्करोगाच्या गाठी) असलेल्या रुग्णांच्या टिश्यूपैकी (FFPE) काढलेल्या डीएनए (DNA) आणि आरएनए (RNA) च्या साहाय्याने अत्याधुनिक 'नेक्स्ट-जनरेशन सिक्वेन्सिंग' (NGS) तंत्रज्ञानाचा वापर करून तपासणी केली जाते.
५१७ कर्करोग संबंधित जनुकांचा वेध!
ही अत्याधुनिक चाचणी कर्करोगाशी संबंधित तब्बल ५१७ जनुकांचे (Genes) सखोल विश्लेषण करते. याद्वारे सोमाटिक सिंगल न्यूक्लिओटाइड व्हेरियंट्स (SNVs), लहान इन्सर्शन्स आणि डिलेशन्स (InDels), ईआरबीबी२ (ERBB2) जनुक अम्पलीफिकेशन, तसेच एएलके (ALK), आरईटी (RET) आणि आरओएस१ (ROS1) मधील जनुक वितळण (Gene Fusions) यांसारख्या अत्यंत सूक्ष्म आणि क्लिष्ट घटकांची अचूक माहिती डॉक्टरांना मिळते.
नाशिकच्या प्रयोगशाळेतच होणार चाचणी
विशेष म्हणजे, ही संपूर्ण चाचणी नाशिकमधील अंबाड औद्योगिक वसाहतीत असलेल्या 'दातार कॅन्सर जेनेटिक्स'च्या आंतरराष्ट्रीय दर्जाच्या प्रयोगशाळेतच केली जाणार आहे. या प्रयोगशाळेला अमेरिकेची 'CAP' (College of American Pathologists) आणि 'CLIA' (Clinical Laboratory Improvement Amendments) या अत्यंत मानाच्या संस्थांची मान्यता मिळालेली आहे.
कर्करोग उपचारांना मिळणार नवी दिशा
सध्याच्या वैद्यकीय जगतात 'कॉप्रेहेन्सिव्ह जेनोमिक प्रोफाइलिंग' (CGP) हे सॉलिड ट्यूमरवरील उपचारांचे मुख्य केंद्रस्थान बनले आहे. या चाचणीमुळे डॉक्टरांना वेगवेगळ्या प्रकारच्या कर्करोगांमधील ट्यूमरच्या जेनोमिक बदलांचे अचूक वर्गीकरण करणे सोपे होणार आहे. परिणामी, प्रत्येक रुग्णाच्या शरीरातील कर्करोगाच्या तीव्रतेनुसार त्याला अत्यंत अचूक आणि प्रभावी औषधोपचार (Targeted Therapy) देणे डॉक्टरांना शक्य होईल, ज्यामुळे रुग्णांचे प्राण वाचण्यास मोठी मदत होणार आहे.