नवी दिल्ली, (वृत्तसंस्था) १४ मे - केंद्र सरकारने लाँच केलेल्या नवीन *'आधार ऍप'*ला देशभरातील जनतेने अभूतपूर्व प्रतिसाद दिला आहे. अवघ्या तीन महिन्यांच्या कालावधीत २१ दशलक्ष (२.१ कोटी) हून अधिक नागरिकांनी हे ऍप डाऊनलोड केले असून, याद्वारे आधारशी संबंधित सेवा आता लोकांच्या 'बोटांच्या टोकावर' आल्या आहेत.
मोबाईल अपडेटसाठी सर्वाधिक वापर
प्राप्त आकडेवारीनुसार, आतापर्यंत २८ लाखांहून अधिक लोकांनी या ऍपचा वापर करून आपला मोबाईल नंबर घरबसल्या अपडेट केला आहे. तसेच ६ लाखांहून अधिक नागरिकांनी पत्ता बदलण्यासाठी या आधुनिक व्यासपीठाचा लाभ घेतला आहे. कुठेही न जाता, केवळ मोबाईलवरून कागदपत्रांची पूर्तता होत असल्याने नागरिकांचा वेळ आणि श्रम वाचत आहेत.
सुरक्षित आणि प्रगत फीचर्सची मेजवानी
हे ऍप केवळ ओळख दाखवण्यासाठी नसून, त्यात अनेक प्रगत सुरक्षा फीचर्स देण्यात आले आहेत:
फेस व्हेरिफिकेशन: चेहरा पडताळणीद्वारे उपस्थितीची खात्री पटवता येणार.
बायोमेट्रिक लॉक/अनलॉक: युजर आपली बायोमेट्रिक माहिती एका क्लिकवर सुरक्षित करू शकतो.
क्यूआर आधारित संपर्क कार्ड: प्रत्यक्ष व्हिजिटिंग कार्डऐवजी क्यूआर कोडद्वारे सुरक्षितपणे माहिती शेअर करण्याची सुविधा.
प्रमाणीकरण इतिहास: आपली आधार माहिती कुठे वापरली गेली, याचा इतिहास पाहता येणार.
दैनंदिन जीवनात बहुउपयोगी
हे ऍप हॉटेल चेक-इन, रुग्णालयात प्रवेश, वयाची पडताळणी आणि सेवा पुरवठादारांची ओळख पटवण्यासाठी अत्यंत उपयुक्त ठरत आहे. 'ऑफलाइन व्हेरिफिकेशन सीकिंग एंटिटी' (OVSE) या प्रणालीमुळे क्यूआर कोड स्कॅन करून सुरक्षितपणे आणि त्वरित पडताळणी करणे शक्य झाले आहे.
अँड्रॉइड आणि ऍपलवर उपलब्ध
हे आधुनिक ऍप अँड्रॉइड (Google Play Store) आणि आयओएस (Apple App Store) या दोन्ही प्लॅटफॉर्मवर उपलब्ध आहे. गोपनीयतेला सर्वोच्च प्राधान्य देऊन तयार करण्यात आलेल्या या ऍपमुळे आधार धारकांचा सरकारवरील विश्वास अधिक दृढ झाला असल्याचे केंद्र सरकारने म्हटले आहे.
नवीन आधार ऍप, अँड्रॉइड आणि ऍपल (आय ओ एस) या दोन्ही मंचांवर उपलब्ध आहे.नागरिक ते खालील दुव्यांवरून उतरवून घेऊ शकतात:
अँड्रॉइड: https://play.google.com/store/apps/details?id=in.gov.uidai.pehchaan&hl=en_IN
आय ओ एस: https://apps.apple.com/in/app/aadhaar/id6744029871