नाशिक, (प्रतिनिधी) १० मे - दारूच्या नशेत मोबाईलवर जोरजोरात बोलण्यावरून हटकले म्हणून एका संतप्त भाडेकरूने चक्क आपल्या घरमालकालाच बेदम मारहाण केल्याची घटना जुने नाशिक परिसरातील बुधवार पेठेत घडली आहे. या हिंसक हल्ल्यात घरमालकाच्या डोक्यात वजनी वस्तू मारण्यात आल्याने ते गंभीर जखमी झाले असून, याप्रकरणी भद्रकाली पोलीस ठाण्यात गुन्हा दाखल करण्यात आला आहे.
नेमका प्रकार काय?
सागर शंकर भगत (रा. सुभाष वाचनालयासमोर, बुधवार पेठ) असे जखमी झालेल्या घरमालकाचे नाव आहे. त्यांच्या घरात जयेंद्र ठाकरे हा तरुण गेल्या काही महिन्यांपासून भाडेकरू म्हणून वास्तव्यास आहे. शुक्रवारी (८ मे) रात्री साडेबाराच्या सुमारास संशयित जयेंद्र हा घराबाहेर दारूच्या नशेत मोबाईलवर जोरजोरात बोलत होता. त्याचा आवाज मोठा असल्याने आणि रात्रीची वेळ असल्याने घरमालक भगत यांनी त्याला शांत राहण्याची विनंती केली व समजून सांगण्याचा प्रयत्न केला.
"तुला आता जिवंत ठेवत नाही"
समजून सांगण्याच्या रागातून संशयित जयेंद्र ठाकरे हा अधिकच आक्रमक झाला. त्याने भगत यांना अर्वाच्य भाषेत शिवीगाळ करत "थांब, तुला आता जिवंतच ठेवत नाही" अशी धमकी दिली आणि जवळ असलेली एक वजनी वस्तू त्यांच्या डोक्यात मारली. या हल्ल्यात भगत यांच्या डोक्याला गंभीर दुखापत झाली असून, त्यांना तातडीने उपचारासाठी रुग्णालयात दाखल करण्यात आले आहे.
पोलिसात गुन्हा दाखल
याप्रकरणी सागर भगत यांनी दिलेल्या फिर्यादीवरून भद्रकाली पोलिसांनी संशयित भाडेकरू जयेंद्र ठाकरे याच्याविरुद्ध मारहाण आणि धमकी दिल्याचा गुन्हा नोंदवला आहे. पोलीस हवालदार सूर्यवंशी या प्रकरणाचा अधिक तपास करत आहेत. शहरात किरकोळ वादातून होणाऱ्या अशा हिंसक घटनांमुळे नागरिक चिंतेत आहेत.