मुंबई, (प्रतिनिधी) २ मे - अंमली पदार्थ नियंत्रण विभागाने (NCB) 'ऑपरेशन व्हाईट स्ट्राईक' अंतर्गत कोकेन तस्करी करणाऱ्या एका बलाढ्य आंतरराष्ट्रीय टोळीचा पर्दाफाश केला आहे. मुंबई आणि ठाणे परिसरात केलेल्या दोन मोठ्या कारवायांमध्ये एनसीबीने ३४९ किलो उच्च प्रतीचे कोकेन जप्त केले असून, आंतरराष्ट्रीय बाजारपेठेत याची किंमत तब्बल १,७४५ कोटी रुपये आहे.
६ महिन्यांपासून ठेवली होती पाळत
देशात दरवर्षी सरासरी २०० ते ३०० किलो कोकेन जप्त केले जाते, मात्र एनसीबीने एकाच कारवाईत ३४९ किलो कोकेन पकडून ऐतिहासिक कामगिरी केली आहे. गेल्या सहा महिन्यांपासून विभाग या टोळीवर बारीक लक्ष ठेवून होता. गुप्त माहितीच्या आधारे कळंबोली-भिवंडी कॉरिडॉरमध्ये एकाच वेळी अनेक ठिकाणी छापे टाकून हे जाळे उघड करण्यात आले.
क्रिकेट पॅड्स आणि यंत्रसामग्रीत लपवले होते कोकेन
तस्करांनी अमली पदार्थ लपवण्यासाठी अत्यंत आधुनिक पद्धतीचा वापर केला होता.
कळंबोली कारवाई: पहिल्या टप्प्यात कळंबोली येथील वेअरहाऊस कॉम्प्लेक्सजवळ एका मारुती सुझुकी सुपर कॅरी गाडीतून १३६ किलो कोकेन जप्त करण्यात आले. हे कोकेन चक्क क्रिकेट पॅड्स आणि ग्लोव्हजमध्ये लपवले होते.
भिवंडी कारवाई: पकडलेल्या आरोपीच्या चौकशीनंतर भिवंडीतील रेहनाळ येथील लक्ष्मण कंपाऊंडमधील एका गोदामावर छापा टाकण्यात आला. तिथे आणखी २१३ किलो कोकेन आढळले.
तपासानुसार, हे कोकेन परदेशातून आयात केलेल्या यंत्रांच्या पोकळीत लपवून आणले जात होते. अमली पदार्थांच्या वासाचा पत्ता लागू नये म्हणून प्रत्येक पाकिटावर पॉलिथीनचे ९ थर आणि काळ्या तेलकट पदार्थाचा लेप लावला होता.
गृहमंत्री अमित शाह यांच्याकडून कौतुक
केंद्रीय गृहमंत्री अमित शाह यांनी 'X' (ट्विटर) वरून या कारवाईची माहिती देत एनसीबीच्या पथकाचे अभिनंदन केले. "पंतप्रधान नरेंद्र मोदी यांच्या नेतृत्वाखाली देश अमली पदार्थमुक्त करण्यासाठी आम्ही कटिबद्ध आहोत. ही कारवाई सरकारच्या 'झिरो टॉलरन्स' धोरणाचे उत्तम उदाहरण आहे," असे त्यांनी म्हटले आहे.
मुख्य सूत्रधाराचा शोध सुरू
या संपूर्ण तस्करीमागे मोठी आर्थिक रसद आणि आंतरराष्ट्रीय व्यवस्थापन असल्याचे समोर आले आहे. या साखळीतील मुख्य सूत्रधार आणि वितरकांचा शोध घेण्यासाठी एनसीबीने तपासचक्र वेगवान केले आहे. मुंबई आणि परिसरात इतक्या मोठ्या प्रमाणात कोकेन पकडले गेल्याने खळबळ उडाली असून, भविष्यातील मोठ्या तस्करीच्या योजना उधळल्या गेल्या आहेत.
?ref_src=twsrc%5Etfw%7Ctwcamp%5Etweetembed%7Ctwterm%5E2050077348138279100%7Ctwgr%5Ef9c0a2198be98687b564988c735a73237d71934d%7Ctwcon%5Es1_c10&ref_url=https%3A%2F%2Fwww.pib.gov.in%2FPressReleasePage.aspx%3FPRID%3D2257416reg%3D1lang%3D9