नाशिक, (प्रतिनिधी) ३० एप्रिल - शहरातील गंजमाळ भागात बुधवारी (दि. २९) जुन्या वादातून एका १९ वर्षीय तरुणावर धारदार कोयत्याने सपासप वार करून त्याला जीवे मारण्याचा प्रयत्न केल्याची खळबळजनक घटना घडली आहे. याप्रकरणी भद्रकाली पोलीस ठाण्यात दोन संशयितांविरुद्ध गुन्हा दाखल करण्यात आला असून, परिसरात दहशतीचे वातावरण पसरले आहे.
पोलीस चौकीजवळच थरार मिळालेल्या माहितीनुसार, रेहान अन्सार शेख (१९, रा. श्रमिकनगर, गंजमाळ) हा तरुण बुधवारी गंजमाळ पोलीस चौकी परिसरातून पायी जात होता. यावेळी पूर्ववैमनस्य मनात धरून दबा धरून बसलेल्या सद्दाम कचरू अत्तार आणि अहमद अन्वर शहा (दोघे रा. गंजमाळ) या दोघांनी त्याला गाठले. संशयितांनी रेहानला शिवीगाळ करत अडवले.
मानेवर आणि हातावर सपासप वार या हल्ल्यात सद्दाम अत्तार याने रेहानला घट्ट पकडून ठेवले, तर अहमद शहा याने आपल्या कमरेला लावलेला धारदार कोयता काढून रेहानवर सपासप वार केले. या हल्ल्यात रेहानच्या मानेवर आणि हातावर गंभीर जखमा झाल्या आहेत. जखमी अवस्थेत त्याला तातडीने उपचारासाठी हलवण्यात आले असून, त्याचे वडील अन्सार निसार शेख (४८) यांनी याप्रकरणी भद्रकाली पोलिसांत फिर्याद दिली आहे.
दोघांविरुद्ध गुन्हा दाखल भररस्त्यात आणि पोलीस चौकीच्या परिसरातच घडलेल्या या घटनेमुळे कायदा-सुव्यवस्थेचा प्रश्न पुन्हा ऐरणीवर आला आहे. पोलिसांनी सद्दाम अत्तार आणि अहमद शहा या दोघांविरुद्ध 'जीवे ठार मारण्याचा प्रयत्न' (Section 307) केल्याप्रकरणी गुन्हा दाखल केला आहे. सहाय्यक पोलीस निरीक्षक पवार या प्रकरणाचा अधिक तपास करत आहेत.