मुंबई, (प्रतिनिधी) २६ एप्रिल - पार्किन्सन (कंपवात) आजाराने त्रस्त असलेल्या रुग्णांसाठी एक दिलासादायक बातमी समोर आली आहे. मुंबईतील प्रसिद्ध 'जसलोक हॉस्पिटल अँड रिसर्च सेंटर'ने आर्टिफिशिअल इंटेलिजन्स (AI) आणि प्रगत तंत्रज्ञानाच्या जोरावर पार्किन्सनमधील सर्वात आव्हानात्मक समजल्या जाणाऱ्या 'एफओजी' (FOG- Freezing of Gait) या समस्येवर प्रभावी उपाय शोधण्यासाठी पाऊल उचलले आहे. या उपक्रमामुळे पार्किन्सनच्या रुग्णांचे निदान आणि व्यवस्थापन अधिक सुलभ होणार आहे.
आंतरराष्ट्रीय स्तरावर संशोधनाचे आदान-प्रदान
या उपक्रमाविषयी माहिती देताना डॉ. दोशी म्हणाले की, "न्यूरोसर्जिकल संशोधनामध्ये आंतरराष्ट्रीय सहकार्य अत्यंत आवश्यक आहे. सामायिक क्लिनिकल जबाबदारी आणि वैज्ञानिक शिस्त यामुळे अधिक अचूक आणि भविष्यवेधी संशोधनाचे मार्ग खुले होतात. जगभरातील पार्किन्सनच्या रुग्णांसाठी 'एफओजी' हे मोठे आव्हान आहे. अल्झायमर संशोधनाप्रमाणेच हे संशोधनही आता केंद्रस्थानी आले आहे. आमच्या संस्थेने नुकताच नवीन प्रोग्रामिंग तंत्राद्वारे या समस्येवर उपाय शोधणारा शोधनिबंध प्रसिद्ध केला असून, तो रुग्णांसाठी उपयुक्त ठरेल."
एआय तंत्रज्ञानाचा प्रत्यक्ष वापर
जसलोक हॉस्पिटलचे सीईओ जितेंद्र हरियाण यांनी यावेळी रुग्णालयाच्या दृष्टिकोनावर प्रकाश टाकला. ते म्हणाले, "जसलोक हॉस्पिटल एआय (AI) या तंत्रज्ञानाचा वापर केवळ आधुनिकता म्हणून नाही, तर रुग्णांच्या आयुष्यात सकारात्मक बदल घडवण्यासाठी करत आहे. गुंतागुंतीचे न्यूरोलॉजिकल पॅटर्न सोपे करण्यासाठी 'स्केलेबल एआय'चा वापर करून आम्ही आजारांचे लवकरात लवकर निदान सर्वांसाठी सुलभ करत आहोत. यामुळे उपचारांचा दर्जा सुधारण्यास मोठी मदत होईल."
रुग्णांचे आरोग्य सुधारेल
क्लिनिकल न्यूरोसायन्स, एआय आणि व्हिडिओ-आधारित विश्लेषण यांचे संयोजन असलेला हा उपक्रम भारतच नव्हे तर जागतिक स्तरावर पार्किन्सन आजाराचे व्यवस्थापन बदलून टाकणारा ठरेल. तंत्रज्ञानाच्या या वापरामुळे गुंतागुंतीच्या न्यूरोलॉजिकल प्रश्नांचा सखोल अभ्यास करणे शक्य होणार असून, संशोधनाचे प्रयत्न अधिक पद्धतशीर आणि रुग्णांसाठी उपयुक्त राहणार आहेत.
काय आहे 'एफओजी' (FOG)?
पार्किन्सनच्या रुग्णांमध्ये चालताना अचानक पाय जमिनीला चिटकल्यासारखे वाटणे किंवा हालचाल थांबणे याला 'फ्रीझिंग ऑफ गेट' (FOG) म्हणतात. हे या आजारातील सर्वात मोठे आव्हान मानले जाते, ज्यावर आता नवीन तंत्रज्ञानाद्वारे मात करण्याचा प्रयत्न केला जात आहे.